Qırğızıstan Prezidenti Sooronbay Jeenbekov 2019-cu ilin yekunlarına dair mətbuat konfransında ölkənin keçmiş lideri Almazbek Atambayevin taleyinə biganə qalmadığını bildirib.
Prezident deyib:
“Onun taleyinə biganə deyiləm, biz silahdaş idik. Ölkəmiz üçün ən çətin illərdə – 2005 və 2010-cu illərdə (mart və aprel inqilabları illəri) birlikdə idik. Xalqımızın qəbul etmədiyi bütün rejimlərə qarşı birlikdə mübarizə aparmışıq”.
Eurasia Diary xəbər verir ki, S.Jeenbekovun sözlərinə görə, sələfi tərəfindən onun ünvanına hücumlar çox olub, amma o, heç vaxt cavab verməyib. “Ölkənin birliyi mənim üçün daha vacibdir. Cəmiyyətimizi parçalamaq cəhdləri oldu, konstitusiya quruluşunun dəyişdirilməsinə çağırışlar edildi. O (Atambayevi nəzərdə tutur) məni, özünü və dövləti dalana gətirib çıxardı”.
Prezident qeyd edib ki, əvvəllər Atambayevlə məsələləri ikilikdə və şəxsən həll edə bilərdilər, amma indi – eks-dövlət başçısının tutulması üçün aparılan xüsusi əməliyyat zamanı baş verən iğtişaşlardan sonra bütün məsələlər qanun çərçivəsində həll edilməlidir:
“Parlamentin gəldiyi qənaəti gördünüz, mən heç nəyi azalda və heç nə əlavə edə bilmərəm. Bunu görmək mənim üçün asan deyil, amma mən bir nəfərin deyil, cəmiyyətin maraqlarını qorumalıyam”.
Qırğızıstan parlamentindəki ən böyük partiyanın – Sosial-Demokrat Partiyasının lideri A.Atambayev 2017-ci il prezident seçkilərinin nəticələrinə görə hakimiyyəti öz varisi və ən yaxın müttəfiqi Jeenbekova təhvil verdi. Ancaq qısa müddətdən sonra eks-prezident komandasının üzvlərinə qarşı cinayət işi başlanıldı. Atambayev keçmiş prezident statusundan məhrum edildi və ağır və xüsusilə ağır cinayətlərdə ittiham edildi. Keçmiş dövlət başçısı ona və tərəfdarlarına qarşı irəli sürülən bütün ittihamların siyasi xarakter daşıdığını dəfələrlə bəyan edib.
Qırğızıstanın xüsusi xidmət orqanları 7-8 avqust tarixlərində sabiq prezident Atambayevin paytaxtdan 20 kilometr məsafədə yerləşən Koy-Taş kəndindəki iqamətgahında saxlanılması üçün əməliyyat keçirib. İlk gün sabiq prezidentin tutulması mümkün olmayıb. Ertəsi gün keçmiş prezidentin özü təhlükəsizlik qüvvələrinə təslim olmasına baxmayaraq, tərəfdarlarla təhlükəsizlik qüvvələri arasında toqquşmalar yenidən başlayıb və səhərə qədər davam edib. Xüsusi əməliyyat nəticəsində Səhiyyə Nazirliyinin məlumatına görə, 136 nəfər yaralanıb, bir xüsusi təyinatlı öldürülüb. Sonradan xüsusi dövlət komissiyası baş verənlərə görə bütün məsuliyyətin Atambayevin üzərinə düşdüyünü bəyan edib.
(teleqraf.com)