Azərbaycanın regionlarında sahibkarlığın inkişafı üçün yerli və beynəlxalq təşkilatlar tərəfindən birgə layihələr icra olunur. Bunlardan biri də “Balakən regional “ABAD” mərkəzi vasitəsilə Şəki-Zaqatala iqtisadi zonasında kiçik ailə təsərrüfatlarının inkişafına dəstək” layihəsidir. Avropa İttifaqı (Aİ) tərəfindən maliyyələşdirilən və Birləşmiş Millətlər Təşkilatının İnkişaf Proqramı (BMTİP) tərəfindən “ABAD” publik hüquqi şəxsi ilə birgə icra edilən bu layihənin ötən hərfə
Şəkidə bağlanış mərasimi keçirilib.
Eurasia Diary xəbər verir ki, öncə Şəki “ABAD” Keramika və Tətbiqi Sənət Mərkəzində layihə çərçivəsində ərsəyə gələn məhsulların sərgisinə baxış olub. Sonra Aİ-nin Azərbaycandakı nümayəndəliyinin rəhbəri səfir Kestutis Yankauskas, BMTİP-in Azərbaycandakı əlaqələndiricisi Alessandro Frakassetti, “ABAD” publik hüquqi şəxsin direktoru Rüfət Elçiyev regionlarda bu layihədən yararlanan ailələrə baş çəkdilər. Layihədə iştirak edən sahibkarlar göstərilən dəstəyə görə təşkilatçılara minnətdarlılqarını bildirdilər.
Daha sonra layihənin nəticələri ilə bağlı təqdimat oldu. Aİ səfiri Kestutis Yankauskas bildirdi ki, istehsal olunan məhsulların üzərində keyfiyyət nişanı var: “Ümid ediərəm ki, Azərbaycana, xüsusilə Şəkiyə gələcək turistlər bu məhsullarla tanış olacaqlar. Mən ilk növbədə ailələrə təşəkkür edirəm, çünki onların bu qabiliyyəti, səriştəsi olmasaydı, layihə də reallaşa bilməzdi. Qeyd edim ki, Avropada ailə biznesləri inkişaf edib. Avropa İttifaqında bizneslərin 99 faizini ailə biznesi təşkil edir. İqtisadiyyatımızın əsas sütunu ailə biznesləridir. Sosial rifah, iqtisadi inkişaf həmin ailə bizneslərinə əsaslanır. Ümid edirəm ki, burada da eyni vəziyyət olacaq”.
BMTİP-in Azərbaycan üzrə əlaqləndiricisi Alessandro Frakassetti isə layihədə tərəfdaşlıqdan məmnunluğunu ifadə etdi: “Belə layihlər vasitəsilə regionlarda sahibkarlığın inkişaf etməsini, Azərbaycanın bölgələrinin daha da firavan yaşamasını istərdik. Layihədən çıxardığımz əsas fikir ondan ibarətdir ki, fərdlər, ailələr və istehsalçılar arasında əməkdaşlıq sözsüz ki, ciddi dəyişikliyə, transformasiyaya imkan yaradır və bu da nəticədə onların yaşayış şəraitlərinin daha da yaxşılaşmasına imkan verir”.
O bildirdi ki, bu layihə həm də təşkilatlar arasında əməkdaşlığın bariz nümunəsidir. “Biz bu layihədə ASAN, “ABAD”, “ABAD”ın Balakən nümayəndəliyi ilə əməkdaşlıq etmişik. Düşünürəm ki, bu əməkdaşlıq modeli ölkənin digər regionlarında da tətbiq oluna bilər. Nəticədə yerli əhali bu əməkdaşlığın yaratdığı imkanlardan istifadə edərək inkişafa doğru addım ata bilər. Biz də BMTİP olaraq onlara bu prosesdə dəstək verməyə hazırıq”.
Xatırladaq ki, 2017-ci ildən start verilən layihə çərçivəsində 44 kəndli ailəsinə kiçik bizneslərini qurmaq və ya genişləndirmək üçün dəstək verilib. Kiçik ailə təsərrüfatlarına başlanğıc üçün əsas təlimlər təşkil edilib, onlar lazımi resurslarla təmin edilib. Sözügedən təlimlər biznesin inkişafı və planlaşdırılması, brendinq və satış, maliyyə uçotu və hüquqi xidmətlər, həmçinin qablaşdırma, qida təhlükəsizliyi, logistika, kommunikasiya və beynəlxalq ticarətin əsasları kimi müxtəlif mövzuları əhatə edib. Təlim kurslarını müvəffəqiyyətlə başa vurduqdan sonra ailələr əsas avadanlıq və təchizat üçün müraciət hüququ qazanıblar.
200 nəfərin birbaşa, 350 nəfərin isə dolayısı ilə faydalandığı layihədə 44 yeni ailə təsərrüfatından 22-sini qadınlar idarə edir. O cümlədən, 12-sini məcburi köçkünlər reallaşdırır. Bu yeni bizneslər qida istehsalından dekorativ sənətkarlığa qədər müxtəlif istiqamətləri əhatə edir. Ailələrin hazırladığı bütün məhsullar tezliklə "ABAD" etno-butiklərində və ölkəmizdəki bəzi supermarket şəbəkələrində satışa təqdim ediləcək.
Həşim Məmmədov
