“Aİ-95 və Aİ-98 markalı benzinin qiymətləri Tarif Şurası tərəfindən müəyyən edilmir. Bununla bərabər, hər iki markalı benzinin Azərbaycanın emal güclərinə aid müəssisələrdə hələ istehsal edildiyi görünmür. Hər iki neft məhsulu ölkəmizə kənar mənbələrdən idxal olunur”.
Bu sözləri Ednews - a açıqlama zamanı enerji məsələləri üzrə ekspert Zəfər Vəliyev yaxın zamanda Aİ-95 markalı benzinin qiymətinin Tarif Şurası tərəfindən müəyyən olunması ilə bağlı iddialara cavab verərkən bildirib.
Ekspertin sözlərinə görə, Azərbaycanda istifadə olunan Aİ-95 və Aİ-98 markalı benzin Rusiyanın və Avropanın emal müəssisələrində istehsal olunur.
“Tarif Şurası yalnız Aİ-92 markalı benzinin və dizel yanacağın qiymətini müəyyənləşdirir. Ancaq Azərbaycanın emal müəssisələrinə aid digər neft məhsullarının, o cümlədən sürtkü yağlarının və təyyarə yanacaqlarının qiymətlərinin təyin edilməsi şuranın səlahiyyətlərinə daxil deyil. Bu məhsulların qiymətləri azad bazar şərtləri çərçivəsində formalaşır”.
Söhbət əsnasında Zəfər Vəliyev Heydər Əliyev adına neft zavodunda hazırda aparılan yenidənqurma və modernləşdirmə işlərindən söz açıb.
“2025 - ci ildə başa çatması gözlənilən yenidənqurma işləri iki paket, yəni A və B paketi əsasında aparılır. İlkin mərhələdə avropa standartlarına və ekoloji tələblərə cavab verən dizel yanacağı və Aİ-92 markalı benzinin istehsalı başlanılacaq. Əgər mümkün olsa, 2023-ci ildə Aİ-95 markalı benzinin istehsalına imkan yaradıla bilər”.
Ekspert, həmçinin hesab edir ki, yeni neft zavodunun tikintisi ilə bağlı iki mərhələli modernləşdirmə işlərinin aparılması barədə Azərbaycan Dövlət Neft Şirkətinin yekun bir qərarı yoxdur.
“Dövlət Neft Şirkətinin rəsmiləri bir çox neft məmulatlarının emalı və istehsalının mümkünlüyü ilə bağlı dəfələrlə bəyanatlar veriblər. Məsələn, yaddımdadır ki, neft şirkətinin emal sahəsi üzrə sabiq vitsa-prezidenti David Məmmədov açıqlamasında belə bir söz işlətmişdi ki, şəraitin yaranacağı təqdirdə qurum Aİ-95 markalı benzinin istehsalına təkid eləyə bilər. Azərbaycanda yeni zavodun tikintisindən söhbət gedirsə, onda demək olar ki, Heydər Əliyev adına neft emalı zavodunda xarici şirkətlərin vasitəçiliyi ilə mövcud texnoloji qurğuların rekonstruksiyası, o cümlədən yeni texnoloji qurğuların inşası həyata keçirilir. Ölkəmizdə yenidənqurma işlərini bütün mərhələlərdə aparmaqla Aİ-95, Aİ-98 və digər yanacaq məhsullarının istehsalına yol açmaq lazımdır”.
Qeyd edək ki, Azərbaycanda Aİ-95 markalı benzinin qiymətinin də Tarif Şurası tərəfindən müəyyən olunacağı, bununla yanaşı, ölkəmizdə yaxın zamanda bu markalı benzinin istehsalına başlanacağı və bu sahədə hazırlıq işləri görüldüyü ilə bağlı iddialar dolaşır.
Yunis Abdullayev