Şəkər tozunun qiymətində bahalaşma müşahidə olunur. 

 

Məlumata görə, 2 gündür mağazalarda tapılmayan məhsul bu gündən etibarən  4 % bahalaşma ilə piştaxtalarda peyda olub.

 

Ümumiyyətlə, şəkər tozunun qiymətinin artmasının səbəb nədir?  Məsələ ilə bağlı Ednews –a açıqlamasında iqtisadçı Asif İbrahimov qeyd edib ki, vətəndaşlar bundan sonra da şəkər tozunun bahalaşmasına müşahidə edəcək. 

 

“Bahalaşmaya gətirib çıxaran müəyyən səbəblər var. Bilirsiniz ki, ölkəmiz şəkər çuğundurunun böyük bir hissəsini xaricdən idxal olunur. Bu məhsulun idxalında Rusiya, Ukrayna və Qazaxıstan əsas rol oynayır. Rusiya və Ukrayna arasında baş verən müharibə nəticəsində idxalda bir sıra çətinliklər və problemlər yaranıb. İlkin problemi Azərbaycana məhsulların daşınmasının marşrut istiqamətləri ilə əlaqələndirmək lazımdır. Bilirik ki, Ukrayna öz məhsullarını taxıl, şəkər çuğunduru, və  digər bitki növlərini Rusiya üzərindən Azərbaycana gətirirdi. Hazırda bu yol bağlandığı üçün müxtəlif yollardan istifadə etmək qərarına gəlinib.  Digər bir faktoru da nəzərə almaq lazımdır ki, Ukrayna məhsullarının, hətta Qara dəniz üzərindən daşınması da artıq mümkünsüz hala gəlib. Ukrayna 95 % məhsulunu dünyaya ixrac edə bilmir. Eyni zamanda Rusiyaya tətbiq olunan sanksiyalar və məhdudiyyətlər taxıl, buğda və şəkər idxalında vəziyyəti daha da ağırlaşdırıb. Rusiya öz daxili tələbatını ödəmək üçün məhsulların ixracatında məhdudiyyətlər tətbiq etmək məcburiyyətində olub. Bütün bunlar şəkər tozunun qiymətinin bahalaşmasına səbəb olan faktorlardandır”. 

 

Asif İbrahimov  qiymət artımının digər ərzaqların qiymətlərinə, eləcə də əhalinin ümumi gəlirlərinə mənfi təsir göstərəcəyini də bildirib. 

 

“Əvvəl şəkər tozunu 1 manat 20 qəpiyə alırdıq, indi isə bundan qat-qat yüksək qiymət görəcəyik.  Bu, əlbəttə ki, ailənin büdcəsinə, minimum və orta əmək haqlarına da öz təsirini göstərəcək. Bununla yanaşı, kərə yağı daxil olmaqla digər məhsulların qiymətlərində də artım gözlənilir”. 

 

Milli Məclisin deputatı Razi Nurullayev isə şəkər tozunun qiymətinin 4 % artımını o qədər ciddi bahaşlaşma hesab etməyib. 

 

“Mən şəxsən gözləyirdim ki, şəkər tozunun qiymətində bu rəqəmdən də daha çox  bahalaşma hiss olunacaq. Amma qiymətin bahalaşmasından bir neçə gün əvvəl mağazalarda şərkər tozunun yığışdırılmasını mötəkirlik hesab edirəm. Bu insanlara qarşı ədalətsiz yanaşmadır.  Nəzərə alaq ki, Azərbaycanda indi bütün sahələrdə bahalaşma gedir. 4 % artım vətəndaşların sosial güzarını üçün müəyyən çətinliklər yarada bilər, lakin digər məhsulların qiymətlərinə nisbətən xeyli aşağıdır. Eyni zamanda hesab edirəm ki, hökumət bütün əlaqəli təşkilatlarla birlikdə qiymətlərin bahalaşmaması üçün qanunvericilikdə nəzərdə tutulan imkanlardan isitfadə edib mühüm tədbirlər görməlidir”.

 

Yunis Abdullayev

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan
Telegram: @eurasia_diary