“Vergi və digər dövlət qurumlarında informasiya və elektron texnologiyaların və yanaşmaların tətbiqi kölgə iqtisadiyyatına qarşı daha rasional mübarizə üçün platforma yaradır”.
Bunu Ednews-a açıqlamasında iqtisadçı ekspert Əyyub Kərimov bildirib.
Ekspert Azərbaycanda bu sahədə həyata keçirilən tədbirlərdən də danışıb. Eyni zamanda, o, problemin düzgün həllinə yönəldilən əlavə addımlar haqqında məlumat verib.
“Azərbaycan iqtisadi təhlükəsizliyin təmin edilməsi məsələsinə lazımi diqqət yetirir. Milli təhlükəsizliyin bu növünün tərkib hissəsi kölgə iqtisadiyyatıdır. Bu məsələ o qədər aktualdır ki, mövcud problemin siyasi cəhətdən yenidən qurulması ilə bağlı dəfələrlə Nazirlər Kabineti səviyyəsində müşavirə keçirən dövlət başçısının nəzərindədir. Vergi və digər dövlət qurumlarında informasiya və elektron texnologiyaların və yanaşmaların tətbiqi kölgə iqtisadiyyatına qarşı mübarizədə daha rasional mübarizə üçün platforma yaradır. Bu addım sahibkarlıq və kommersiya fəaliyyətinə nəzarətin qurulmasına şərait yaradır. Lakin bu istiqamətdə müəyyən iqtisadi çatışmazlıqlar var. Bu çatışmazlıqları aradan qaldırmaq üçün əlavə addımlar atılmalıdır. Bu, gömrük, vergi sistemində açıq şəkildə özünü göstərir”, - həmsöhbətimiz qeyd edib.
İqtisadçı ekspert bəzi sahibkarların vergi ödəməməsinin mənfi nəticələrinə diqqət çəkib.
“Vergidən yayınma təcrübəsi təkcə Azərbaycanda deyil, bütün dünyada böyük problemdir. Ümumiyyətlə, bu amil tam miqyaslıdır. Dövlət strukturlarının əsas funksiyası bu prosesə ciddi nəzarət etməkdir. Birinci addım olaraq vergi sisteminin müasirləşdirilməsidir. Modernləşmənin əsas iqtisadi aspekti vergi sisteminin rəqəmsallaşdırılması olacaq. Bir çox ticarət obyektlərində nəzarət-kassa aparatlarının tətbiqi rəqəmsallaşmanın bariz nümunəsi sayıla bilər. Digər tərəfdən, Azərbaycanda vergidən yayınma hallarının qarşısını almaq üçün maliyyə rıçaqları tətbiq edilməlidir. Bunun üçün ölkədə vergi faizi aşağı salınmalıdır”, - deyə müsahib vurğulayıb.
Kərimov sonda inhisarlaşma probleminə də toxunub. Onun sözlərinə görə, inhisarlaşma dövlətin həm iqtisadi, həm də siyasi müstəvisində böyük problemlər yaradır.
“Ümumiyyətlə, bu, “iqtisadi liberallaşmanın ölümünə” gətirib çıxarır. İnhisarlaşmanın əsas mənfi nəticəsi rəqabət qabiliyyətinin azalmasıdır. Üstəlik, inhisarçılıq yerli istehsalın məhsuldarlığının azalmasına səbəb olur ki, bu da öz növbəsində xarici malların əksəriyyətinin keyfiyyətsiz olmasına gətirib çıxarır”, - deyə iqtisadçı fikrini yekunlaşdırıb.
Xaliq Quliyev