Xəbər verdiyimiz kimi, yeni qayda ilə Mərkəzi Bank tərəfindən verilən yenidənmaliyyələşdirmə kreditlərinin şərtləri dəyişdirilib.
Yeni qaydaya görə, bundan sonra 180 gündən çox olmayan müddətə verilən yenidənmaliyyələşdirmə kreditləri Mərkəzi Bankın pul siyasətinin həyata keçirilməsi məqsədilə birbaşa və ya dolayı hərraclar vasitəsilə ilə veriləcək. (Mərkəzi Bank banklara yenidənmaliyyələşdirmə və sonuncu instansiya kreditləri verir). Bundan əlavə, onlara verilən kreditlər üzrə təminat hərracın keçirildiyi gündən 3 iş günü ərzində rəsmiləşdirilmədikdə kreditin verilməsindən imtinaolunacaq. Bundan əvvəl sözügedən müddət 5 gün nəzərdə tutulmuşdu.
İqtisadçı ekspert Elçin Süleymanovun sözlərinə görə, Mərkəzi Bankın yeni qaydası inzibatçılıqla əlaqədardır və buna qaydaların bir az daha sərtləşməsi demək olar.
“Birincisi kreditlərin altı aya qədər olan hərrac vasitəsilə olması həm şəffaflıq, həm obyektivlik baxımdan faydalıdır. Mərkəzi Bankın kredit verərkən banklara qarşı ayrı-seçkiliyi və s. ilə bağlı müxtəlif söz-söhbətlər ola bilirdi. Bu hərrac vasitəsilə olduğu zaman həm iştirakçılar, həm də şərtlər açıq olur. İkincisi, bu kreditə qarşı bankların təqdim etdiyi aktivlər, dəyərlərin daha əvvəl 5 günə olan müddətin 3 günə endirilməsi də prosesin həm ciddiliyi, həm də çevikliyi baxımdan əhəmiyyətlidir.
İqtisadçı-alim həmçinin qeyd edib ki, Mərkəzi Bank ölkənin pul siyasətinin əsas oyunçularından biridir və dünyada COVID-19-dan sonra görünən canlanma fonunda və təbii ki, bank fəaliyyətlərinin fonunda Mərkəzi Banka müraciətlər artır, ondan kredit tələb edən bankların sayı, həmçinin kredit tələblərinin həcmi çoxalır.
“Buna görə hərrac vasitəsilə bu prosesin daha şəffaf, obyektiv, eyni zamanda daha çevik, yəni 5 günün 3 günə endirilməsi başadüşüləndir. Qeyd etdiyim kimi, bu Mərkəzi Bankın inzibatçılıq və müəyyən qədər qaydalarda intizamın artırılmasına yönəlik hesablanmış tədbiridir”.
Ekspert əlavə edib ki, yeni qayda banklara çox ciddi mənada təsir göstərməyəcək.
“Çünki banklar daha əvvəl də o prosedura riayət edirdilər. Sadəcə hərrac vasitəsilə olması dolayı və ya birbaşa olaraq bankların və Mərkəzi Bankın məsuliyyətini bir az artıracaq”.
Gülnar Səlimova