Ölkədə qiymət artımının qısa müddət ərzində qarşısının alınması və inflyasiyanın azaldılması üçün hazırda dövlətin ata biləcəyi addımlar ekspertlər tərəfindən müzakirə edilir. Səsləndirilən fikirlərdən biri də əlavə dəyər vergisinin (ƏDV) faiz dərəcəsinin aşağı salınmasıdır. Bəzi ekspertlər ərzaq məhsulları və dərmanlarda ƏDV-nin 18%-dən 2%-ə endirilməsini təklif edir.
“Bu yaxşı haldır, amma söhbət effektivlikdən gedir. Ərzaqda ƏDV-nin aşağı salınmasından varlılar kasıblardan daha çox yararlanacaq”.
Bu sözləri mövzu ilə bağlı Ednews-a danışarkən iqtisadçı ekspert Eldəniz Əmirov bildirib. O bildirib ki, ƏDV-nin aşağı salınmasının əleyhinə deyil.
Lakin…
“Təbii olaraq ƏDV-nin həm dərman, həm də ərzaq məhsularında 18%-dən 2%-ə salınması qiymətlərə müsbət təsirini göstərəcək. Amma ƏDV-nin aşağı salınması hesabına dövlət büdcəsinin itirdiyi vəsaitin böyük hissəsindən aztəminatlılar yararlanmayacaq. Yəni bundan çoxtəminatlılar və imkanlılar daha çox yararlanacaq”.
Ekspert qeyd edib ki, hazırki məqamda aztəminatlıların daha çox dəstəyə ehtiyacı var. Bunun üçün o, hesab edir ki, dərman vasitələrində ƏDV-nin aşağı salınması daha doğru olardı. Çünki hər iki təbəqə yalnız birbaşa xəstə olduğu zaman həmin dərman vasitələrini alır.
“Ərzaq məhsullarına yönəlik vəsaitləri isə varlılarda və kasıblarda fərqlidir. Minimum əmək haqqı alan ərzağa 100-150 manat pul xərcləyir, amma ailələr var ki, 1500 manat xərcləsə də bu məsələdə daha çox faydası var”.
İqtisadçı əlavə edib ki, sosial cəhətdən aztəminatlı ailələrə və həssas qruplara ünvanlı şəkildə birbaşa dəstək göstərilməsinə daha çox ehtiyac var. Onun sözlərinə görə, bu zaman dövlət büdcəsi həm az vəsait itirər, həm də bu güzəşt daha effektiv olar.
Gülnar Səlimova
