Ukraynada davam edən müharibədə Rusiya ağır itkilər verməyə başlayıb. Mümkün olan bütün vasitələri işə salmağa çalışan rus ordusu canlı və texniki itkilərə baxmayaraq bunu nə meydanda, nə də iqtisadi və siyasi aləmdə büruzə verməyə çalışır. 

Yeri gəlmişkən, artıq son həftə ərzində Rusiyanın ən nəhəng enerji daşıyıcısı olan “Qazprom” şirkəti Avropanı yenə şam işığında buraxıb. Etibarlı mənbələrin verdiyi məlumata görə, ötən gün “Qazprom” Fransanın “Engie” şirkətinə iyul ayında tədarüklərin tam ödənilməməsi səbəbindən qazın nəqlini sentyabrın 1-dən dayandırıracağı barədə xəbərdarlıq edib. Bundan başqa Almaniya ilə Rusiyanın "Şimal axını" qaz kəməri tamamilə fəaliyyətini dayandırıb. 

Ednews-a açıqlama verən iqtisadçı ekspert Eldəniz Əmirov bildirib ki, Rusiyanın müharibəni dayandırması onun birmənalı olaraq məğlubiyyəti deməkdir.  

“Rusiya bir bataqlığın içinə yuvarlanmış haldadır. İstər müharibə dayandırılsın, istərsə də davam etsin, Rusiya üçün bunun bir əhəmiyyəti qalmayıb. Ümumiyyətlə istər diplomatiya, istər iqtisadiyyat, istərsə də müharibə sahəsində Rusiya üçün heç də gözəl bir ssenari görünmür. Bu səbəbdən də Rusiya pisi seçməklə, yəni müharibəni dayandırmaqla daha doğru addım atmış olar”. 

Ekspert bildirib ki, Rusiya müharibəni dayandırsa belə onu ağır sınaqlar gözləyəcək. 

“Müharibənin dayandırılması Rusiyanın böyük bədəllər ödəməsinə səbəb olacaq. Rusiya sonadək sanksiyalardan azad ola bilməyəcək. Hesab edirəm, yalnız dünyada ərzaq böhranının aradan qaldırılması məqsədilə müəyyən sanksiyalar aradan götürülə bilər. Qalan sanksiyalar Rusiya iqtisadiyyatını tamamilə çökdürülməsi üçün öz qüvvəsində qalacaq”. 

Eldəniz Əmirov həmçinin yaxın gələcəkdə Rusiyada ciddi dəyişiklərin baş verəcəyi barədə də müəyyən proqnozlar verib. 

“Rusiyanın qaz təchizatı ilə bağlı hazırda Qərbə qarşı oynadığı oyunlar bir qədər təsirli görünə bilər. Lakin ilin sonuna hələ 4 ay var. Bu kifayət qədər uzun bir müddətdir. Hesab edirəm ilin sonunadək Rusiyada ciddi gərginlik özünü göstərməyə başlayacaq. Çünki Rusiyada artıq sanksiyaların təsiri özünü işsizliyin artması ilə göstərməyə başlayıb. Bu barədə hətta rəsmi şəxslər də məlumat verməyə başlayıb”. 

Rusiya qazını kəsməklə Avropanın əzmini sındıraraq onu istədiyinə vadar etdirə bilməsi məsələsinə gəlincə isə ekspert bunun mümkün olmayacağını deyib:

 “Qərb, xüsusilə Avropa qışın soyuğunda qalmağı artıq öncədən nəzərə alıb. Mən deyərdim ki, Avropa qazsız qalmağı Rusiyanın güclənməsindən daha üstün sayır. Bu səbəbdən də mən düşünmürəm Rusiyanın ən böyük enerji təchizatçısı olan “Gazprom” Avropanın qazını kəsməklə onun əzmini qıra bilsin”.

Elnur Ənvəroğlu