Xəbər verdiyimiz kimi Kocaeli şəhərinin Gebze mahalının bələdiyə başçısı Zinnur Büyükgözün başçılığı ilə Türkiyə nümayəndə heyətinin Bakıya səfəri davam edir.
Ednews-un verdiyi xəbərə görə, sentyabrın 9-da nümayəndə heyəti Beynəlxalq Avrasiya Mətbuat Fondunun Bakı ofisində mətbuata bəyanatla çıxış edib. Keçirilən mətbuat konfransında Türkiyənin hakim Ədalət və İnkişaf Partiyasından (AKP) olan deputat Cəmil Yaman, Kocaeli şəhərinin Gebze mahalının bələdiyyə sədri Zinnur Büyükgöz, AK partiyanın Kocaeli şəhərinin "Qadın Kolları" təşkilatının başçısı Yasəmən Özdəmir, Türkiyənin Azərbaycandakı səfirinin müşaviri Hüseyn Altınalan və digər rəsmilər iştirak ediblər.
Gebze mahalının bələdiyə başçısı Zinnur Büyükgöz konfransda media nümayəndələrinin suallarını cavablandırıb.
O, Türkiyənin Qarabağda investisiya, layihələrlə bağlı sualını bu cür şərh edib:
“Prezident cənab İlham Əliyevin iradəsi ilə işğaldan azad edilən torpaqlarda nəzərdə tutulan yenidənqurma, bərpa və məskunlaşma ilə əlaqəli görüləcək tədbirlə bağlı plan hazırlanmaqdadır. O plan çərçivəsində görüləcək işləri izləyən şəxslərdən biri də mən özüməm. Plan hazırlanıb bitdikdən sonra türk firmaları həmin bölgəyə yatıracağı investisiyaları nəzərdən keçirəcək. Cənab İlham Əliyevin və Rəcəb Tayyib Ərdoğanın iradəsi ilə Şuşa, Ağdam və Qarabağın digər bölgələrində bir sıra istehsal müəssisələrinin qurulması, ən əsası yenidəqurmanın hansı sənaye istiqamətində aparılması plan əsasında nəzərdən keçiriləcək və diqqətə alınacaq”.
Bələdiyyə başçısı söhbətin davamında bunları bildirdi:
“Bakıda olarkən burada xeyli sayda türk firmalarının fəaliyyət göstərdiyinə şahidi olduq. Bu nə deməkdir? Türkiyədə bir çox şirkət sahibləri azərbaycanlı qardaşları ilə əməkdaşlıq edirlər. Bələdiyyə sədri olduğum Gəbzədə bir çox şirkətlər Azərbaycanda bizneslə məşğuldurlar. Gebzede şirkətlər Qarabağa investisiyalar qoymağa hazırdılar. Onu da qeyd edim ki, türk firmaları Qarabağın yenidən qurulmasında təkcə iqtisadi gəlir əldə etmək üçün yox, həmçinin tarixi və mədəni öhdəlik də daşıyırlar”.
Z.Büyükgöz “Türkiyə bələdiyyələri ilə Azərbaycan bələdiyyələri arasında qardaşlıq əməkdaşlıq gözlənilirmi?” sualına isə bu cür cavab verib:
“Bələdiyyə əlaqərimiz geniş formada əməkdaşlığa çevrilə bilər. İş birliyi anlamında əlaqəmiz inkişaf edə bilər. İki dövlət, bir millət olaraq qardaşıq, istər bu rəsmi, istərsə də qeyri-rəsmi olsun. Qardaş olmağın hüququnu hər şəkildə çalışdıra bilərik”.
Xatırladaq ki, 7-10 sentyabrda nəzərdə tutulan səfərdə heyət TİKA, Yunus Əmrə İnstitutunda və Bakı Dövlət Universitetində baş tutacaq görüşlərdə də iştirak edəcəklər.