İran tezliklə Rusiyadan Azərbaycan vasitəsilə gündə 9 milyon kubmetr qaz alacaq.

İran və Rusiya arasında tranzit qazın Azərbaycana iqtisadi faydaları barədə Ednews-a şərh verən energetika üzrə ekspert Zəfər Vəliyev qeyd edib ki, hazırda Rusiya qarşısında duran əsas məsələlərdən biri alternativ qaz bazarları axtarmaqdır.

“Rusiya Ukraynada apardığı müharibəyə görə, Avropada böyük bazarını itirib. Demək olar ki, Rusiyanın Yamal-Avropa qaz kəmərinin fəaliyyəti tam dayanıbdır. Şimal Axın qaz kəmərinin nəql gücü 20% civarında işləyir. Ukraynaya doğru gedən qaz kəmərinin nəql gücü isə təximini 30-40 % civarındadır. Beynəlxalq qaz bazarında Rusiyanın ixracat qabiliyyəti zəifləyib. Ona görə də Rusiya davamlı olaraq alternativ qaz bazarları axtarışındadır”.

Ekspertin sözlərinə görə, Rusiya Azərbaycan və Mərkəzi Asiya ölkələri ilə birlikdə qaz infrastruktur layihələri üzərində ciddi tədbirlər görə bilər.

“Məsələ burasındadır ki, İranın şimal bölgələrində hər zaman qaza ehtiyac olub. Azərbaycanın Rusiya və İran arasında qaz tranzitinə qoşulacağı və qoşulmayacağından söhbət getmir. Bu kimi məsələlər sonradan da müzakirə edilə bilər. Lakin istənilən halda Azərbaycanın mövqeyi ondan ibarət olub ki, qonşu dövlətlər ölkəmizin neft və qaz nəql sistemlərimizdən, ixrac imkanlarımızdan istifadə edə bilərlər. Bununla bağlı, Xəzəryanı ölkələr arasında əməkdaşlıq platforması hazırlanıb, müqavilələr imzalanıb”.

Zəfər Vəliyev tranzit qaz kəmərinin Azərbaycana o qədər də dividentlər gətirməyəcəyini bildirib.

“Azərbaycan və İran arasında qaz kəmərinin nəql gücü 8 milyard kubmetrdən yuxarı deyil. Həqiqətən, bu kəmər vasitəsilə İrana artıq qaz həcmləri ötürmək mümkün deyil. Lakin İran qazın nəqli üçün Rusiya və Türkmənistan qaz kəmərlərindən də yararlana bilər. Həmin kəmərlərin nəql gücü daha yüksəkdir”.