Xəbər verdiyimiz kimi, Azərbaycan Respublikasının İqtisadiyyat naziri Mikayıl Cabbarov ölkə iqtisadiyyatının qeyri-neft sektorunda artımla bağlı açıqlama verib.
Xatırladaq ki, nazirliyin məlumatına görə, qeyri neft-qaz sektorunda artım əvvəlki ilə müqayisədə 10.3% artaraq 43 mlrd 303.5 milyon manat olub.
Nazir, həmçinin qeyd edib ki, yaxın dövrlərdə qeyri-neft sektoru sahələrində artımın daha da sürətlənməsi müşahidə ediləcək.
Bu sahədə son proseslər barədə Ednews-a şərh verən iqtisadçı-professor Elşad Məmmədov qeyri-neft sektorunda nailiyyətlərlə bağlı meyarları və trendləri doğru hesab edib.
Söhbət zamanı o, bildirib ki, inflyasiya göstəricilərinin metodikası ilə əlaqəli olan suallara mütləq cavab tapılmalıdır.
“Son illər ərzində cənab prezidentin bilavasitə tapşırıqları əsasında ölkədə qeyri-neft sektorunun, xüsusilə sənayeləşmənin inkişafı ilə bağlı mexanizmlərin tətbiq olunması, dövlət proqramlarının icra edilməsi, dövlət kapitalının bu istiqamətdə yönləndirilməsi hazırki iqtisadiyyatın göstəricilərinə öz müsbət təsirini göstərib. Amma bir məsələni də qeyd etmək istəyirəm ki, əgər biz inflyasiyanın düzgün hesablanmasını təmin etməsək, bir çox sahələrdə iqtisadi artımla bağlı olan göstəricələrdə dəqiqliyi təmin etmək qeyri-mümkün olacaq”.
İqtisadçının sözlərinə görə, qeyr-neft sektorunda artım təqdirəlayiq olsa da, iqtisadiyyatın neftdən asıllığının azalması üçün münasib deyil.
“Neft sektorunun iqtisadiyyatda payı hər zaman xeyli dərəcədə çox olub. Hesab edirəm ki, qeyri-neft sektorunda artım neft və qaz sektorundakı müsbət kontektura müəyyən edir. Yəni, bu sektora aid olan sahələrdə artımlar və ya azalmalar birbaşa neft sektorunda vəziyyətlə bağlıdır. Neftdən asıllığı azaltmaq üçün bir çox işlər və tədbirlər görülməlidir. Unutmayaq ki, Azərbaycan ixracatının 90% -i neft və qazla əlaqəlidir. Ölkədə həyata keçirilən pul-kredit siyasəti, heç kimə sirr deyil ki, xarici valyutanın alışı hesabına reallaşdırılır. Xarici valyuta isə ixracatdan gəlir. Bütün bu prosesləri mütləq təhlil etmək lazımdır. Yalnız hansısa şüarların və bəyanatların səsləndirilməsi ilə iş bitmir. Qeyri-neft sektorunda inkişaf istiqamətlərini müəyyənləşdirən tapşırıqları mütləq yerinə yetirmək lazımdır”.
Sonda Elşad Məmmədov qeyd edib ki, qeyri-neft sektoruna daxil olan sahələrdə genişmiqyaslı inkişafın təmin edilməsi üçün ilk növbədə investisiyaların stimullaşdırılması lazımdır.
“İqtisadiyyatın öz qanunları var. İqtisadi artımın əsas təminatçısı investisiyaların yatırılmasıdır. İnvestisiya yatırımı dedikdə ilk növbədə dövlət büdcəsindən ayrılan vəsaitləri və xarici şirkətlərin yatırımlarını nəzərdə tuturuq. Xarici şirkətlər isə ölkəmizdə neft və bank sektorlarına maraq göstərirlər. Ona görə də biz investisiyaları daxili yatırımlar vasitəsilə ilə təmin etməliyik. Daxili yatırımlar isə yalnız dövlət kapitalı ilə bağlı ola bilməz, çünki biz bazar iqtisadiyyatında yaşayırıq. Deməli, bizə özəl investisiyalar lazımdır, bunun üçün də müvafiq pul-kredit siyasəti aparılmalıdır”.