Mərkəzi Bank 2022-ci ilin sonunadək inflyasiyanın artacağını açıqlayıb.
Belə ki, Mərkəzi Bankdan bildirilib ki istehsalçıların 20 faizi inflyasiyanın artımını gözləyir.
Məsələ ilə bağlı iqtisadçı Elçin Rəşidov Ednews-a münasibət bildirib:
“2022-ci ildə ən böyük inflyasiya ərzaq məhsulları üzrə olub.Bu baxımdan Mərkəzi Bankın rəhbərliyinin bu artımı idxalla əlaqələndirilməsi doğru deyil. Azərbaycanda qiymətlərin yüksək olmasının səbəblərindən biri də dünya bazarına yaxşı inteqrasiya olmaması və ciddi monopoliyanın olmasıdır. 2023-cü ilə kimi inflyasiyanı azaltmaq üçün ciddi tədbirlər görülməlidir. Məsələn Nazirlər Kabinetinin 2022-ci ildə qəbul etdiyi anti-inflyasiya tədbirlərinin əksini etmək lazımdır. Bu anti-inflyasiya adı altında keçirilən tədbirlər qiymətləri artıracaq tədbirlərdir. Bu kimi tədbirlər ümumilikdə qiymət azalmasına xidmət etməyib”.
Ekspert bildirib ki, Mərkəzi Bank hər il inflyasiyanı öz strategiyasına uyğun olaraq hədəfləyir.
“Hesab edirəm ki, bu yanlış addımdır. Çünki Mərkəzi Bank inflyasiyaya nəzarət edə bilməz. Manatın alıcılıq qiyməti dollara bağlıdır. Monetar siyasət olaraq əgər onlar inflyasiyanı azaltmaq istəsələr fiskal siyasətə müraciət etməlidir. Çünki ölkədə monetar siyasət fiskal siyasətin törəməsidir. Ölkədə qeyri-neft sektorunu və əmək məhsuldarlığını aşağı salan bir siyasətdir. İdxal siyasəti uzun zamandır ki dövlət tərəfindən dəstəklənir. İxrac siyasəti isə cəzalandırılır. Nəticədə biz də bunun “bəhrəsinin” görürük”.
Ekspert həmçinin az təminatlı ailələrdən də söz açıb. Onun sözlərinə görə ölkənin inflyasiya hədəflənməsi deyil, iqtisadiyyat hədəfləməsi olmasıdır. Bu həm məşğuliyyəti artıran, həm də əhalinin gəlirini artıran bir yoldur.
“Əgər inflyasiya gözlənilirsə dövlət nəticədə qiymət artımından yaranan zərərləri qarşılamaq üçün həssas qruplarla məşğul olmalıdır.
Ölkənin uzunmüddətli iqtisadi inkişafı üçün bizə düzgün strateji inkişaf qərarları qəbul etmək lazımdır. Eyni zamanda iş yerlərini ölkənin ixrac və istehsal qabiliyyətini qorumaq lazımdır. Mərkəzi bank inflyasiyanı hədəfləyə bilməz,yalnız müşahidə edə bilər”.
Ayan Rzayeva