Mikayıl Cabbarovun açıqlamasına görə, 2023-cü ilin yanvar-sentyabr ayları ərzində dövlət əmlakının özəlləşdirilməsindən dövlət büdcəsinə 95,5 milyon manat daxil olub. 2022-ci ilin analoji dövrü ilə müqayisədə 78% artım müşahidə olunub.
Bəs Azərbaycanda özəlləşdirmə ən çox hansı sahələrdə tətbiq edilir?
Bu barədə Ednews-a danışan iqtisadçı ekspert Ruslan Atakişiyev hansı sahələrin özəlləşdirməyə daha çox ehtiyacın olduğunu qeyd edib.
“Bu gün Azərbaycanda hansı dövlət sahələri daha az mənfəət gətirirsə, o sahələrin özəlləşdirilməsi daha məqsədəuyğundur. Bu yolla dövlət bu müəssisələrin saxlanılması üçün xərclənən subsidiyalardan qurtulmuş olur. Müəssisələrin özəlləşdirildiyi təqdirdə şirkətlərə əlavə investisiyalar gəlir. Bu baxımdan, hazırda bir çox dövlət müəssisələri vardır ki, onların özəlləşdirilməyə ehtiyacı var. Məsələn, su təchizatı, energetika, qaz təchizatı və nəqliyyat sahəsində bir çox müəssisələr özəlləşdirmə həyata keçirməlidir”.
Xarici investorlar hansı amillərə xüsusi diqqət yetirir sualına ekspert bu cür münasibət bildirdi:
“Xarici investorlar daha çox həmin sektorlara üstünlük verirlər ki, ona gələcəkdə nəzarət edə bilirlər. Buna həm iqtisadi, həm də hüquqi məsələlər aiddir. Xarici investorların ən çox maraqlandlığı sahələr iri həcmli böyük layihələrdir ki, açıq bazara çox sayda məhsul ixrac edirlər. Geniş perspektivdən baxsaq investorlar, əsasən 50 milyondan çox dəyəri olan bizneslərlə maraqlanırlar”.
Ekspert xarici yatırımların nəyə görə özəl və ya dövlət sahələrinə üstünlük verdiyini də açıqladı:
“Qeyd edim ki, xarici investorlar dövlət müəssisələrindənsə özəl şirkətlərə investisiya yatırmağa çalışırlar. O vaxt dövlət sahələrinə investisiya qoymağa üstünlük verirlər ki, burada hər hansı xüsusi strateji əhəmiyyətli bir məqsəd olsun. Misal üçün, neft sektoru Azərbaycanda ən çox xarici investisiya cəlb edən dövlət sektorudur. Qeyri-neft sektorunda isə, əksinə olaraq, yenə də xarici yatırımlarım sayı özəl müəssisələrdə daha çoxdur”.
Fərid Axundov