2024-cü ilin dövlət büdcəsi haqqında qanun layihəsinə əsasən, gələn il dövlət büdcəsindən cəmi 7 rayona vəsait ayrılacaq. Bu il büdcədən dəstək alan Lerik rayonu gələn il öz gəlirləri hesabına dolanmalıdır.

Gələn il hansı rayonlara vəsait ayrılacaq?

Mövzu ilə bağlı Ednews-a danışan deputat Vüqar Bayramov artıq rayonların özlərini maliyyələşdirməli olacaqlarını bildirib.

“Rayonların iqtisadiyyatının intensiv inkişafı üçün regionlara ayrılan dövlət büdcəsinin azaldılması ilk növbədə xərclərin Qarabağa yönləndirilməsinə şərait yaradacaq. Bu o deməkdir ki, növbəti il 59 rayon və şəhər gələn il yerli gəlir və xərcləri tənizmləmək üçün mərkəzləşdirilmiş xərclərdən vəsait almayacaq. Bununla da onlar özünümaliyyələşdirmə prinsipi ilə işləməli olacaqlar. Qeyd edək ki, dövlət büdcəsindən 2022-ci ildə 14 rayon vəsait ayrılıb. Lakin, son illər hər il əvvəlki ilə nisbətən dövlət büdcəsindən pul alan rayonların sayı azalır.
Layihəyə əsasən, gələn ilin dövlət büdcəsindən Cəbrayıl 1 milyon 214 min manat, Xocavənd 1 milyon 229 min manat, Xocalı 1 milyon 73 min manat, Kəlbəcər 1 milyon 945 min manat, Laçın 1 milyon 401 min manat, Yardımlı 1 milyon 863 min manat və Zəngilan 623 min manatlıq vəsait ala biləcəklər. Bu il dövlətdən alınan məbləğ 12 milyon 306 min manat idisə, bu gələn il 9 milyon 348 min manat olacaq. Bütün rayonlar üzrə dövlət büdcəsindən ayrılan vəsaitin həcmi gələn il azaldılacaq”.

Deputat həmçinin bu qərarın rayonlara təsirindən də danışıb. O, qeyd edib ki, gələn il büdcədən vəsait alacaq 7 rayonun altısı Qarabağ və Şərqi Zəngəzurda yerləşir. 

“İşğaldan azad olunan ərazilərimizdən kənarda sadəcə Yardımlı rayonu dövlət büdcəsindən dəstək ala biləcək. Özünü maliyyələşdirəcək rayonların sayının artması dövlət büdcəsindən asılılığın aradan qaldırlması baxımdan vacibdir. Yerli hakimiyyət orqanlarının məhsuldarlığı baxımından bu qərar müsbət nəticə verməlidir”.

Ümumiyyətlə, qanunun həyata keçirilməsində məqsəd nə idi sualına deputat yerli iqtisadiyyatın azad şəkildə inkişaf etdirilməsinin əsas məqsəd olduğunu bildirib:

“Bununla yanaşı, hazırda əsas hədəflərdən biri də iqtisadiyyatın balanslı inkişafının dəstəklənməsi və region ilə paytaxt arasındakı iqtisadi fərqin mərhələli şəkildə azaldılmasıdır. Bu baxımdan, həmin rayonlara daha çox sərmayə cəlbinin təşviq edilməsi çox vacibdir. Bu da öz növbəsində dövlət büdcəsindən ayrılan sərmayənin hesabına baş tutmayacağı üçün yeni gəlir mənbələrinin cəlb edilməsi mütləqdir. Rayonlarımızın iqtisadiyyatlarını azad şəkildə inkişaf etdirməsi ərazilərdə yaşayan əhalinin rifahına da əlbəttə ki, müsbət təsri edəcək”.

Fərid Axund