“Azərbaycan neft dövlətidir, lakin COP29-a ev sahibliyi etməsi dünyanın ehtiyac duyduğu keçid hekayəsi ola bilər”.
Ednews xarici mediaya istinadən xəbər verir ki, bu sözləri İqlim kommunikasiyaları üzrə məsləhətçi Nik Medik mətbuata açıqlaması zamanı deyib.
Onun sözlərinə görə, kollektiv fəaliyyət göstərmədən əvvəl bütün ölkələrin müəyyən siyasi standartlara cavab verməsini gözləməmək qərarı strateji xarakter daşıyır:
“Siyasi çağırışlara baxmayaraq, iqlim dəyişikliyi ilə mübarizə qlobal prioritet olaraq qalır. COP29-a ev sahibliyi edən Azərbaycan unikal enerji keçid hekayəsini nümayiş etdirir. Təşəbbüslərə dəniz külək enerjisi layihələri, bölgədəki ən böyük günəş elektrik stansiyası və 5 GVT elektrik enerjisinin 2030-cu ilə qədər Xəzər-Qara dəniz-Avropa yaşıl enerji dəhlizi vasitəsilə ixracı planları daxildir”.
Qeyd edək ki, Nik Medik Azərbaycan mediasında yaşıl enerjinin inkişafı və Bakıda keçiriləcək COP29 haqqında məlumatların artırılması proqramına dəstək verir.
Xatırladaq ki, Azərbaycan BMT-nin İqlim Dəyişmələri üzrə Çərçivə Konvensiyasına tərəf olmaqla qlobal iqlim dəyişmələrinə qarşı mübarizəyə qoşulub. Ölkəmiz 1990-cı illə müqayisədə 2030-cu ilə qədər istixana qazlarının miqdarını 35 faiz azaldılmasını hədəfləyir. 2030-cu ildən sonra isə daha iddialı hədəf müəyyən edilib ki, bu da 2050-ci ilə qədər istixana qazlarının miqdarını 40 faiz azaldılmasından ibarətdir.
Azərbaycan Respublikasının Prezidenti ölkəmizin işğaldan azad edilmiş torpaqlarını “Yaşıl enerji” zonası elan edib. Bu ərazilərin 2050-ci ilədək “Netto sıfır emissiya” zonasına çevrilməsi nəzərdə tutulur.
BMT-nin İqlim Dəyişmələri üzrə Çərçivə Konvensiyasına Tərəflərin Konfransı – COP Konvensiyasının ali qərar qəbul edən orqanıdır. Katibliyi Bonnda yerləşir. Hər il dünyanın hər yerindən hökumət nümayəndələri COP-da toplaşaraq iqlim dəyişmələrinin qarşısının alınması və fəsadlarının aradan qaldırılması istiqamətində birgə səylər göstərmək üçün çağırışlar edir. COP-un ilk toplantısı 1995-ci ildə Berlin şəhərində keçirilib.
Oğuz