Son günlər müxtəlif ölkələrin nümayəndələri, dövlət başçılarının ölkəyə çoxsaylı səfəri müşahidə olunandır. Bununla yanaşı, bu dövr ərzində ölkə başçısının da bir sıra xarici ölkələrə səfərini qeyd etmək olar. Bunların hər biri Azərbaycan Respublikasının Cənubi Qafqaz və Yaxın Şərqdə yüksək mövqe tutmasından xəbər verir. Elə yaxın günlərdə Gürcüstan Prezidenti Mixail Kavelaşvilinin ölkəyə rəsmi səfəri, Prezident İlham Əliyevin Çinə səfəri və mühüm sənədlərin imzalanması söylənilənlərə bariz nümunədir. Lakin bunlarla yekunlaşmır. Aprelin 28-i də vacib bir tarix olaraq yadda qaldı. Belə ki, İran İslam Respublikasının Prezidenti Məsud Pezeşkianın Azərbaycana rəsmi səfəri baş tutdu. İran-Azərbaycan münasibətləri tarixi, dini, coğrafi və strateji baxımdan mürəkkəb və çoxşaxəli bir dinamikaya malikdir. Bu münasibətlərin formalaşması və inkişafında həm regional güc balansı, həm də daxili siyasi və ideoloji amillər mühüm rol oynayıb. Sözügedən görüş çərçivəsində isə bir neçə mühüm məsələlərin müzakirəsinə yer verilib və müxtəlif sahələr üzrə vacib sənədlər imzalanıb. Lakin sual doğur:
Sözügedən səfər nələri vəd edir? 

Mövzu ilə bağlı EDnews-a açıqlama verən politoloq Oqtay Qasımov qeyd edib ki, sözügedən səfər, ikitərəfli münasibətlərdə mühüm addım kimi qiymətləndirilə bilər:

"İran-Azərbaycan arasında baş tutan görüş, yeni bir mərhələnin əsasını təşkil edir. Görüş zamanı İran Prezidentinin bəyanatları da deyilənlərə əsas verir. İranın dövlət strukturu spesifik və çoxpilləlidir. Ölkədə əsas qərarverici şəxs Prezident olsa da, ali rəhbər və onun ətrafında cəmləşmiş dini və təhlükəsizlik qurumlarının siyasi proseslərə təsiri çox böyükdür. Bu baxımdan, Prezidentin niyyətləri nə qədər müsbət olsa da, Tehran-Bakı münasibətlərində əsaslı dəyişikliklərin baş verməsi üçün bu qurumların da eyni dərəcədə dəyişiklik istəyi və iradəsi olmalıdır. Bu gün İran daxilində müəyyən dairələr hələ də Azərbaycana qarşı şübhəli və ehtiyatlı yanaşmanı davam etdirirlər. Bununla belə, Prezident səviyyəsində baş tutan bu səfər münasibətlərin istiləşməsi və dialoqun genişlənməsi baxımından vacib addım ola bilər. Xüsusilə ticarət, enerji, nəqliyyat və mədəniyyət sahələrində əməkdaşlıq imkanlarının artması mümkündür. İran-Azərbaycan münasibətlərində rasional yanaşmanın dominantlıq etməsi həm də regional sabitliyə və əməkdaşlığa töhfə verə bilər".

Politoloq əlavə edib ki, İranın Azərbaycana qarşı siyasətində real və dərin dəyişikliklərin baş verməsi üçün yalnız niyyət deyil, sistemli siyasi iradə də lazımdır. Ən önəmlisi isə, bu münasibətlərin inkişafı üçün qarşılıqlı etimadın qurulması və qorunmasıdır.

Aytac Kərimova//EDnews