Güclü yaddaşa sahib olmağı kim istəməzki?
İstər yaşlı, istərsə də cavan olsun hamının istəyi güclü yaddaşa sahib olmaqdır. "Açarları hara qoydum? Bu şkafı niyə açmışdım? Telefonumu harada qoydum"? kimi sulları hər kəs özünə verib. Unutqanlıq hamının ortaq problemidir. Problemin çarəsi isə öz əlinizdədir.
"Eurasia Diary" Hurriyet-ə istinadən xəbər verir ki, mütəxəssislərin təqdim etdiyi 8 məsləhətə əməl etsəniz güclü yaddaşa sahib olacaqsınız.
1. Hər gün yeni şeylər öyrənməyə davam edin.
Kitab oxumaq, yeni məqalələr oxumaq, tapmaca tapmaq, krassvord həll etmək ilk sırada yer alır. Hətta yeni bir dil öyrənmək də yaddaşı gücləndirir. İnsan beyni öyrənməyə həmişə acdır. Ona görə də siz yeni şeylər öyrəndikcə beyniniz daha da güclənəcəkdir.
2. Davamlı və keyfiyyətli yuxu yatan insanların güclü yaddaşının olduğu müşahidə edilib.
Gündə ən azı 8 saat yatın və yuxunuzu gecə saatlarında alın. Çünki gündüz yuxusu ilə gecə yuxusu eyni keyfiyyətdə deyil.
3."Sağlam düşüncə sağlam bədəndə olur" ifadəsi yerində işlədilib.
İnsan orqanizmi nə qədər sağlam olsa, beyin və yaddaş da bir o qədər sağlam olar. Ona görə də idmanla məşğul olmaq vacibdir. Addımlamaq, yürüşə çıxmaq, sadə məşqlər güclü yaddaş üçün çox əhəmiyyətlidir. Mütləq gün ərzində az da olsa, bunları etməyə çalışın. Qısa məsafəli yerlərə gedərkən nəqliyyatdan istifadə etməyin, lift yerinə pilləkənləri çıxmağa üstünlük verin.
4.Güclü yaddaş üçün vacib olan əsas məsələlərdən biri də qidalanmadır.
Bol tərəvəz və meyvə istehlakı yaddaşınızı gücləndirəcək. Tez-tez qəbul edilən spirt və siqaret də yaddaşın düşmənidir. Bu vərdişləri mümkün olduqca minimuma endirmək və tədricən tərgitmək lazımdır. Fındıq, qoz, badam, balıq kimi məhsulları qidalanma rasionunuza mütəmadi olaraq daxil edin. Zülal qəbul etməyi də unutmayın.
5.İctimai əlaqələrinizi genişləndirin.
Özünüzə yeni hobbi tapın. Beləliklə, həm əyləncəli vaxt keçirərsiniz, həm də beyniniz öyrənməyə davam edər. Beləliklə, daha güclü bir yaddaşa sahib olarsınız.
6. Stressi və hislərinizi idarə edin.
Daim gərgin və stresli əhval-ruhiyyədə olanlar öyrənməkdə çətinlik çəkir və dərk etmə problemi yaşayır. Bu da unutqanlığa yol açır. Mənfi fikirləri və stressi həyatınızdan uzaqlaşdırın.
7. Vitamin kompleksi qəbul edin.
Əgər yetərli qidalandığınızı düşünürsünüzsə Omega-3, A və C vitaminləri qəbul edin.
8. Beyninizi tənbəlliyə meyilli şeylərdən uzaqlaşdırın.
Televizor izləmək, daim kompyuterdə vaxt keçirmək və ünsiyyətsiz həyat tərzi sizi tənbəlliyə sövq edir. Ona görə də belə vərdişlərdən uzaq durun.
Vüsalə Əlövsətqızı