May və sentyabr ayları həm kəskin xəstəliklərin baş vermə, həm də xroniki xəstəliklərin kəskinləşmə dövrdür.
Bu sözləri ölkənin baş terapevti Rəhilə Əliyeva bu gün Kliniki Tibbi Mərkəzdə keçirilən mətbuat konfransında bildirib.
Rəhilə Əliyeva deyib ki, Kliniki Tibbi Mərkəzə ən çox müraciətlər tənəffüs sistemi, ürək-damar, sümük-oynaq, mədə-bağırsaq xəstəlikləri ilə bağlı olur:
“Ölümə səbəb olan birinci xəstəlik ürək-damar sistemi xəstəliyidir. Bu da əsasən hipertoniya, ürəyin işemik xəstəlikləridir. Ötən ilin sentyabr-dekabr aylarında Mərkəzin iki terapiya şöbəsinə 378 nəfər müraciət edib ki, onların 113 nəfəri ürək-damar xəstəsidir. Hətta digər problemlərlə müraciət edən xəstələrdə ürək-damar sistemi xəstəlikləri şikayəti olur.
Müraciətlərlə bağlı ikinci yerdə bronxial astma xəstəliyinin ağırlaşması ilə bağlıdır. Xəstələrin 30-u məhz bu şikayətlə müraciət edib. 17 nəfər isə pnevmaniya ilə müraciət edib.Sümük xəstəlikləri də əsasən mövsüm xarakter daşıdığından bu aylarda qeyd olunan şikayətlər artır.Bundan başqa, 34 nəfər ağciyərin xroniki abstruktiv xəstəliyi ilə bağlı müraciət edib. Bu şikayətlə əsasən siqaret çəkən kişilərdir”.
Baş terapevt bildirib ki, hazırda xəstələr arasında yayılan xəstəlik xroniki respirator virus xəstəliyidir:
“Kəskin respirator xəstəliklər ağır xəstəlik hesab edilməsə də, insanlar bu xəstəliyə qarşı maksimum diqqətli olmalıdır. Ailə belə xəstə olarsa, ondan uzaqlaşmaq çətin olur. Bu zaman çıxış yolu qoruyucu maskalar və qidalanmaya diqqət etməkdir. Digər xroniki xəstəliklərin aktivləşməsinə də səbəb olur”.