Gündəlik həyatda menyunuza əlavə edəcəyiniz qidalar sizi mədə xərçəngindən qoruya bilər. Həzm çətinliyi, mədə rahatsızlığı, yeməkdən sonra şişkinlik, yüngül bulantı, iştahasızlıq və yanğı mədə xərçənginin ilkin əlamətləri ola bilər.
Bu əlamətlərdən hər hansı biri ilə qarşılaşsanız vaxtında və düzgün diaqnoz üçün mütləq qastroenteroloqa getməlisiniz. Amma mədə xərçəngindən qorunmağın da bir sıra yolları var.
Eurasia Diary Türkiyə mediasına istinadla fitoterapevt və tibbi onkoloji uzmanı, doktor Canfəza Sezginin mədə xərçəngindən qoruma üsullarından bəhs edən fikirlərini təqdim edir.
Qırmızı əti həftədə 150-200 qramla məhdudlaşdırmaq, həftədə ən azı 3 dəfədən artıq omeqa-3-lə zəngin olan balıq yemək lazımdır.
Sarımsaq, qırmızı soğan və kəvər kimi səbzilər mədə xərçəngindən qoruyan tərəvəzlərin başında gəlir. Gündə bir baş qırmızı soğan və 2-3 diş sarımsaq yeyə bilərsiniz.
Diş sarımsağı bişirməzdən əvvəl qabığını soyaraq 10 dəqiqə gözləsəniz, onun faydasını artırmış olarsınız.
C vitamini mədə xərçənginin qoruyucusudur. C vitamini ilə zəngin şirin, sarı, yaşıl, qırmızı bibər, brokoli, gül kələmi, kahı, kivi, çiyələk, portağal, bişmiş pomidor və lobya menyuda olmalıdır.
Gündə 100 qram şirin bibər gündəlik C vitamini ehtiyacınızı qarşılayır.
Selenium da mədə xərçəngindən qoruyan maddədir. Fındıq isə seleniumla ən zəngin olan qidadır.
Gündə 100 qram fındıq selenium ehtiyacının 27 faizini qarşılayır. Digər qidalar isə təmiz buğda çörəyi, günəbaxan tumu, toyuq, göbələk, kəpəkli taxıllar, yumurta, pendirdir.
Qatıq və kefir kimi ağartılar mədədə mikroblu infeksiya riskini azaldaraq mədə xərçənginə qarşı sipər yaradır. Növbəli qaydada gündə bir stəkan istifadə oluna bilər.
Təbii bal mədənin iç üzünü saran hüceyrələri ziyandan qoruyur. Xüsusilə qastriti olanlar üçün gündə 1-2 çay qaşığı içilməsi faydalıdır. Ballı kefir və ya ballı qatıq yemək isə iki müdafiə üsulunu birləşdirməkdir.