Avstraliya alimlərinin tibbi kəşfi iflic xəstələrinə sağalma ümidi ola bilər. Melburnda yerləşən tətbiqi sağlamlıq elmləri mərkəzi "Austin Health"də orta yaş həddi 27 olan 13 iflic xəstəsinin tibbi problemli bədən üzvlərindəki sinirlər çıxarılaraq onların yerinə funksiyasını itirməmiş sinirlər yerləşdirilib. Təxminən 2 il davam edən fizioterapiyadan sonra iflic xəstələri əllərini və qollarını hərəkət etdiriblər. Sinir transplantasiyası ilə müalicə olunan iflic xəstələri heç kimin köməyi olmadan yemək yeyə, su içə, dişlərini fırçalaya, yazı yaza, kömpüter işlədə, eləcə də əlil arabasından istifadə edə bilməsi qeydə alınıb.
Dünyanın ən qədim sağlamlıq elmləri jurnallarından biri olaraq tanınan "The Lancet"də verilən xəbərə görə, Nataşa Van Zyl-in rəhbərlik etdiyi komanda tərəfindən tətbiq olunan müalicə metodu müsbət nəticələr verib. Xəbərdə bildirilib ki, cərrahların sağlam sinirləri iflic olmuş əzələlərdəki problemli sinirlərin yerinə köçürülməsi nəticəsində funksiyasını itirmiş əl və qollar yenidən hərəkətə gəliblər.
Nataşa Van Zyl, "The Lancet" jurnalına verdiyi açıklamada "Həm əlləri, həm də ayaqları iflic olan xəstələr üçün əllərinin yenidən işlədilməsi prioritetdir" deyib.
Müalicə olunan xəstələrin onurğasının boyun hissəsinin qırılması nəticəsində iflic vəziyyətə düşdüyü bildirilib. Həmçinin, müalicənin uğurlu olması üçün onurğa iliyinin üst hissəsinin zədə almamış olmasının lazım olduğu vurğulanıb. Müalicənin müsbət nəticələndiyi halda, iflic xəstələri əllərini və qollarını hərəkət etdirə bilirlər. Xəbərə görə, xəstələrin hərəkətlərini tənzimləyə bilməsi və davamlı şəkilə çatdırması üçün fizioterapiya lazımdır.
Deutsche Welle Türkçe
Tərcümə edən: Təbriz Abbasov