Tibb professoru: “İnfeksiyaların anadan uşağa necə keçməsi tam dəqiqləşməyib”
Bakıda yeni doğulmuş körpədə və anasında koronavirus aşkarlanıb. Təcili yardım briqadasının getdiyi çağırışda 3 gün əvvəl dünyaya uşaq gətirən anada və onun körpəsində koronavirusun olduğu müəyyən edilib.
EDNews.net-in məlumatına görə, bunu Bakı şəhəri Təcili və Təxirəsalınmaz Tibbi Yardım Stansiyasının baş həkimi Rauf Nağıyev bildirib. Baş həkimin sözlərinə görə, hazırda həmin ana və uşaq müalicə alır.
Qeyd edək ki, bir çox dünya mütəxəssisləri iddia edir ki, ana bətnindən və ana südündən körpəyə koronavirus yoluxmur. Məsələn, ötən gün Türkiyə mətbuatının yazdığına görə, məşhur uşaq pediatrı, doktor Akgül Akpınarlı Antoni ana bətnindən və ana südündən körpəyə koronavirus yoluxmadığını iddia edib.
Onun sözlərinə görə, bu günə qədər aparılan araşdırmlar bunu bir daha sübut edib: “1 yanvar və 8 fevral tarixlərində Çində yerləşən “Tongi” xəstəxanasında koronavirusa yoluxan 7 hamilə qadın müalicə olunaraq dünyaya sağlam körpə gətiriblər. Yalnız bir körpədə doğuşdan 36 saat sonra koronavirus aşkar edilib”.
Bundan öncə türkiyəli həkim-professor Erkan da virusa yoluxan hamilə qadınlarda xəstəliyin körpəyə keçib-keçməyəcəyi barədə açıqlama vermişdi. O, qeyd etmişdi ki, bətnində uşaq olan qadınlarda da koronavirusun əlamətləri digər insanlarda olduğu kimidir: “İngiltərə Krallıq Doğuş Dərnəyinin verdiyi açıqlamada, hamilə qadından xəstəliyin körpəyə keçməsi halına rast gəlinməyib. Xüsusilə, xəstəliyin sıx görüldüyü Çində doğuşdan sonra körpənin içərisində olduğu amniotik mayedə, kord qanında, yeni doğulan körpənin boğazından alınan köpük nümunələrində ana südündə virus izləri aşkar edilməyib. Məhz buna görə də virusun ananın qarnındakı uşağa keçmədiyi qəbul edilib. Bütün bunlara baxmayaraq, hamilə olduğu təqdirdə koronavirusa yoluxan qadınlar təcili olaraq karantinə alınmalı və lazımi tədbirlər görülməlidir”.
Xatırladaq ki, koronavirus bəlası hələ yeni ortaya çıxdığı zamanlarda bəzi mütəxəssislər uşaqların, eləcə də köpələrin bu virusa yoluxmadığını qeyd edirdi. Lakin sonrakı faktlar bunu təkzib etməyə başladı. İranın Məşhəd şəhərində, həmçinin İngiltərədə, Çində yeni doğulan körpələrdə koronavirus aşkar edildi. Bəs hansı halda anadan körpəyə koronavirus yoluxa bilir? Ana südündən yoluxma mümkündürmü?
Mövzu ilə bağlı tibb elmləri doktoru, professor Adil Qeybulla Musavat.com-a danışıb: “İnfeksiyaların anadan uşağa vertikal, şaquli yolla və yaxud nəsildən keçməsi tam dəqiqləşdirilməyib. İnfeksiya əsasən hava-damcı yolu ilə yayılır. Sosial izolyasiya məhz buna görə həyata keçirilir. Hər halda, ana və uşaq arasında bir müddət müəyyən kontaktlar, o cümlədən doğuş, göbəyin kəsilməsi prosesində və sairə. Məhz bu kontakt zamanı yoluxma mümkün ola bilir.
Qeyd edim ki, bəzi virusların nəinki şaqulli hətta vertikal yolla bir növdən başqa keçərək yoluxması halları olur ki, bu da daha çox gen daşıyıcılığı ilə bağlıdır. Burada çox nüanslar var. Koronaviriusn bu sitiuasiyalardakı davranışı ilə bağlı çox ciddi araşdırmalar gedir və bəzən bu araşdırmlar bir-birini təkzib edir. Ona görə də bu məsələdə əsasən təmas, kontakt məsələləri üzərində dayanmaq lazımdır”.
Adil Qeybulla bildirdi ki, bəzən koronavirusa yoluxan şəxslərdə kliniki əlamətlər olmur: “Almaniyada aparılan müşahidələrə görə heç bir kliniki əlaməti olma iki şəxs kafedə arxa-arxaya oturaraq bir-birinə koronavirus yolxudurublar. Yəni ortada belə faktlar da var. Ona görə də ventilyasiya olmayan yerdə infeksiya hava-dacmı yolu ilə bir şəxsdən başqasına yoluxa bilir. Hətta virus gözün selikli qişasına düşdükdə oradan bədənə keçə bilir. Təbii ki, bu baxımdan anadan yeni doğulan körpəyə virusun keçməsi real ola bilir. Məsələn, ana danışan zaman ora düşən hava damcı kütləsi vasitəsi ilə və ya virus mayelərdə özünə yer tapıbsa uşaq doğuş yollarında qəbul etdiyi mayelərdən yoluxa bilər. Bildiyiniz kimi hətta həkimlərin özləri də bu virusa yoluxur. Bu baxımdan infeksiyanın yoluxma şansları çox böyükdür”.
“Ana südündən körpəyə koronavirus keçə bilərmi” sualımına professor bu cür cavab verdi: “Bəzi virusların, o cümlədən SPİD-in ana südündən uşağa keçməsi sübut olunub. Amma koronavirusla bağlı bu cür tədqiqat yoxudr. Varsa da yetərli tədqiqat ortada yoxdur”.
Adil Qeybulla qeyd etdi ki, yeni doğulan və koronavirusa yoluxan körpənin koronavirusdan sağalması ehtimalları çoxdur: “Onların immun sistemi tam formalaşmadığından anadan keçən yoluxma olduğu üçün koronavirusa qalib gələ bilirlər”.
