Eurasia Diary RKKP Mərkəzi Komitəsinin İctimai Səhiyyə Komissiyasının sədri, millət vəkili, həkim İlya Kleymenov ilə eksklüziv video müsahibəni təqdim edir.
İlya Kleymenov bildirib ki, koronavirus tibb elminə və bəşəriyyətə çoxdan məlumdur, ancaq “COVID-2019” adlı mutasiyası yeni peyda olub.
“COVID-2019 özünü aqressiv apararaq dünyaya yayılmışdır. Lakin panikaya düşmək lazım deyil, çünki tarixdə bir çox pandemiyalar olub. Bir əsr bundan öncə “İspanka” epidemiyası çox sayda insan ölümünə səbəb olmuşdur. Hətta o dövrə aid fotolarda nəqliyyatda insanların maska taxdığını görə bilərik. Sadəcə buna hazır olmaq lazımdır”, o deyib.
Ekspert həkim koronavirusun simptomları olaraq, insanda iybilmə qabiliyyətinin itirilməsi, zəiflik hissi, yuxarı tənəffüs yolarında diskomfort, gücün itirilməsi, dincəlmək istəyi, əzələ ağrılarını qeyd edib. Həmçinin o, simptomsuz yoluxma halları zamanı infeksiya daşıyıcısının ətraf üçün təhlükəli olduğunu xüsusi vurğulayıb.
O bildirib ki, hazırda soyuqdəymənin simptomları varsa bu, potensial koronavirus kimi dəyərləndirilə bilər. Bu simptomları özündə müşahidə edən şəxs evdə qalmalı, həkim çağırmalı, nəzarət altında özünümüalicə zamanı evdətəcrid qaydasına əməl etməlidir. Xəstəliyi yüngül keçirənlər malina çayı içməli, ağır formasında isə dərhal təcili yardıma müraciət edilərək analiz götürülməlidir.
Ekspert, heyvanların da koronavirusa yoluxa bildiyini deyib. O, virusun heyvanlardan insanlara keçmə halının müşahidə edilmədiyini desə də, onun ilk dəfə yarasadan keçmə ehtimalını nəzərə almağımızı qeyd edib.
“Heyvanlar çöldə gəzərkən daşıyıcı kimi də virusun yayılmasına səbəb ola bilir. Buna görə gigiyena qaydalarına və təmizliyə riayət etmək vacibdir. Bir və ya daha çox insanın olduğu məkanda tibbi maska taxmaq lazımdır. Keçmişdə taun epidemiyası dövründə insanlar maskadan istifadə ediblər. Bu həm sizi, həm də digərlərini müdafiə edəcək", deyə bildirib.
O qeyd edib ki, maska taxmaq çox vacibdir. Belə ki, o bizi yoluxmadan 100% müdafiə etməsə də, yoluxmanın dərəcəsini aşağı salır və bu çox əhəmiyyətlidir. Buna görə biz xəstəliyi daha yüngül keçirmiş oluruq. Həmçinin tibbi spirt bizi virusdan tam müdafiə etməsə də virusun təsirlilik dərəcəsini aşağı salır.
Onun sözlərinə görə, hazırda virusun təmamilə məhv edilməsi üçün xüsusi terapiya üsulu mövcud deyil. Lakin virus əleyhinə, onun çoxalmasının qarşısını almaq və təsirini yüngülləşdirmək üçün bəzi dərman preparatlarından istifadə olunur. O, antibiotiklərin həyat və sağlamlıq üçün təhlükəli olduğunu deyib.
“Antibiotiklər bakteriya əleyhinə müalicə metodudur, virus isə hüceyrədaxili həyat formasıdır. Virusun vəzifəsi “sahibi”nin hüceyrəsində parazitlik etmək və ətrafa yayılmaqdır. Koronavirus xəstələrində bir neçə gün sonra test nəticəsi neqativ çıxır. Çünki virus orqanizmi tez tərk edir, amma nəticələri qalır. Bəzən isə aylarla ağırlaşma halı müşahidə olunur. Bunun üçün həkim pasientə fərdi qaydada yanaşaraq müvafiq müalicə üsulu tətbiq edilir", o əlavə edib.
Daha ətraflı videoda:
Müsahibəni aldı: Cəmilə Çebotareva
Tərcümə: Gülnar Səlimova