Bu gündən yeni növ koronavirus infeksiyasına qarşı peyvəndlənmə məqsədi ilə vətəndaşlar Rusiya istehsalı olan “Sputnik V” vaksinindən də istifadə edə biləcəklər. 18 yaşından yuxarı olan və əks göstərişləri olmayan hər bir vətəndaş peyvənd oluna bilər.
Azərbaycanda koronavirus infeksiyasına qarşı vaksinasiyaya yanvarın 18-dən başlanıb və proses könüllüdür. İndiyə qədər təxminən 1.8 milyon şəxsin peyvənd olunduğu bildirilir. Onların 760 mindən çoxunun ikinci mərhələdən keçdiyi vurğulanır. Lakin Azərbaycanda insanların mütləq əksəriyyəti Çin istehsalı olan “Sinovac” vaksini ilə peyvənd olunub.
Qeyd edək ki, bir müddət öncə ölkəyə az miqdarda Rusiyanın “Sputnik V” və Avropada istehsal olunan “AstraZeneca” vaksini də gətirilib. Bu gündən “Sputnik V” vaksinin tətbiqinə başlanılır.
Maraqlıdır ki, dünyanın aparıcı ölkələri “Sputnik V”dən imtina etdiyi, ÜST və digər beynəlxalq tibb qurumlarının hələ də bu vaksinin istifadəsinə müsbət rəy vermədiyi halda, Azərbaycan onun istifadəsinə başlayır. Ortaya maraqlı suallar çıxır: Niyə dünyanın bəyənmədiyi vaksin Azərbaycanda tətbiq olunur? Bu vaksinin hansı xeyri və ya fəsadı ola bilər? Nəhayət, insanlar “Sputnik V” vaksinin seçib-seçməməkdə sərbəstdirlərmi?
Məsələ ilə bağlı Eurasia Diary-nin suallarına cavab verən həkim-infeksionist Vüqar Cavadzadənin sözlərinə görə, həqiqətən də dünyada Rusiya istehsalı olan vaksinə qarşı ciddi kampaniya aparılır: “Bir çox informasiya vasitələri “Sputnik V” vaksini ilə bağlı mənfi fikirlər səsləndirir. Amma bunun heç bir əsası yoxdur. Bilməliyik ki, vaksinin iqtisadi və siyasi tərəfləri var və ona görə də digər istehsalçı ölkələr rəqib ölkələrin istehsal etdiyi vaksinlər haqqında qara piar kampaniyası aparır. Sanki onları gözdən salmağa və dünya bazarında alıcısının azalmasına çalışırlar. Onun üçün də belə neqativ hallar müşahidə olunur. Əslində “Sputnik V” vaksinilə bağlı dünyada ciddi mənfi nəticələrə səbəb olan hallar müşahidə edilməyib”.
O, həmçinin vurğulayıb ki, bütün vaksinlərin göstəriş və əks göstərişləri eynidir, burda fərqli heç nə yoxdur.
“Təbii ki, onkoloji xəstələr, allergiklər, qan sistemində problem olanlar və bəzi digər xəstələrdə vaksinlərə əks göstəriş ola bilər. Başqa neqativ hal olmayan xəstələrə vaksin vurula bilir. “Sputnik V” də istənilən şəxsə vurula bilər və heç bir əks göstəriş yoxdur”.
O ki qaldı vaksinin kimə vurulmasına, V. Cavadzadə bu məsələdə sərbəst seçim olduğunu qeyd etdi: “Vaksin vurulması prosesi özü könüllülük əsasında həyata keçirilir. Bu səbəbdən də, heç kim sizi istəmədiyiniz vaksinlə peyvəndləyə bilməz. Bildiyim qədər, “Sputnik V” ilə peyvəndlənmə vətəndaşların öz istəyi əsasında aparılacaq”.
Seyranə Quliyeva