Şikayətçi Tamerlan Məşədihəsənli iddia edir ki, illərdir şəkər xəstəsi olan anası Qasımova Diləfruz Keymar qızı iki aydır dövlət tərəfindən ona ödənişsiz verilən dərmanları ala bilmir. Xəstə məcburən ağır şəkər xəstələri üçün nəzərdə tutulan preparatı pul ödəyərək apteklərdən əldə edir.
Məsələ ilə bağlı EDNews-a danışan vətəndaş T.Məşədihəsənlinin sözlərinə görə, o, dövlət tərəfindən anasına aylıq verilən Metformin və AMARYL adlı dərmanları almaq üçün 17 yanvar tarixində Nəsimi rayonu, 20 saylı Şəhər Poliklinikasına gedib. Lakin tibb müəssəsində ona bildiriblər ki, AMARYL 4 mq preparatı ilə xəstəni təmin edə bilməyəcəklər.
“Artıq iki aydır ki, AMARYL 4 mq dərmanını əldə edə bilmirəm. Hər dəfə poliklinikaya gedəndə ona az sayda dərman gətirdiklərini və çatdıra bilmədiklərini deyirlər. AMARYL 4 mq-in qiyməti 8 manatdır. Metformin onunla müqayisədə ucuzdur. Hətta bəzi şəxslər Metformini də ala bilmədiklərini deyirlər. Əgər dərman limiti varsa, bu dərmanlar nə üçün apteklərdə doludur?”- deyə o, sual edir.
Məsələ ilə bağlı əvvəlcə Səhiyyə Nazirliyi ilə əlaqə yaratdıq. Nazirlikdən EDNews-a bildirdilər ki, şikayətçinin problemlə əlaqədar rəsmi müraciəti əsasında araşdırma aparılıb cavab veriləcək.
TƏBİB-dən isə sorğumuza cavab olaraq şəkərli diabet xəstələrinə dərmanlarının verilməsi Nazirlər Kabinetinin qərarına əsasən təyin olunduğu qeyd edilib. Tələbnamələr də tibb müəssisələri tərəfindən həmin qərara əsasən hazırlanır.
20 saylı Şəhər Poliklinikası ilə əlaqə yaratmaq cəhdlərimiz isə boşa çıxdı. Təəssüf ki, telefon zənglərimiz cavabsız qaldı.
Qeyd edək ki, dövlət tibb müəssisələrində xəstəxana daxilindəki apteklərə TƏBİB, pərakəndə satış, özəl apteklərə və hər hansı şirkət apteklərinə isə Səhiyyə Nazirliyi nəzarət edir.
Məsələni diqqətdə saxlayacağıq...
Gülnar Səlimova