Son vaxtlar dünyada “donuz qripi” virusu çoxalmaqdadır. Xüsusilə qonşu Rusiyanın yüzə yaxın regionunda bu virus tüğyan edir. “Donuz qripi”nin geniş yayılması Azərbaycan üçün təhlükə hesab edilə bilərmi? Hazırda Rusiyaya gediş gəliş olduğu üçün donuz qripinin adi qrip maskası altında Azərbaycana keçməsi realdır.
Ednews mövzu ilə əlaqədar tanınmış həkimlərin fikirlərini öyrənib. Cavabları təqdim edirik.
Həkim Ələsgər Əsgərli açıqlamasında bildirib ki, qış ayları gəldiyindən istənilən halda vətəndaşlar özlərini virusdan qorumalıdırlar. “Donuz qripi” bir vaxtlar geniş yayılan virus olub. Onun sözlərinə görə, buna baxmayaraq, yüksək qızdırma ilə gələn qrip zamanı bunun adını adi soyuqlama qoyub, qızdırma salan dərmanlardan istifadə etmək olmaz.
“Çünki virusa yoluxma varsa, bu üsulla insan özü-özünü aldadır və qrip daha da dərinləşir. “Donuz qripi”nin fərqli cəhətlərindən biri də odur ki, dərhal ağciyərlərə fəsad verir. Orqanizmin müqaviməti ciddi səviyyədə aşağı düşür və insan pnevmoniya olur. Ona görə də bu zaman həddindən artıq ehtiyatlı olmaq lazımdır. Sərhəd-buraxılış məntəqəsində həkim nəzarəti gücləndirilməlidir. Nəzərə alaq ki, Azərbaycanda qış fəsli də özünəxas formada keçmir. Bu da virusların artmasına səbəb ola bilər. İnsanlar mütləq ehtiyatlı olsun, gigiyenik qaydalara riayət etsinlər”.
Tibb elmləri doktoru, professor Adil Qeybulla “donuz qripi” virusunun A və C formalarının müxtəlif serotiplərindən ibarət olduğunu deyib.
O qeyd edib ki, bu xəstəlik heyvanlar arasında ilk dəfə donuzlarda aşkarlandığı üçün simvolik olaraq “donuz qripi” adlanır:
“Lakin bu xəstəlik insanlarda da müşahidə olunur. “Donuz qripi” zamanı baş verən əlamətlər adi mövsümi qrip infeksiyası ilə oxşardır. Baş, əzələ, bel ağrıları, yüksək hərarət, ürəkbulanma, ishal baş verir. Bu hallar olduğu təqdirdə yaxşı olar ki, xəstələr yataq rejiminə keçsinlər və bol maye qəbul etsinlər”.
Professor müəyyən dərmanlardan istifadə etməyi də məsləhət görüb:
“Baş ağrısı və hərarəti salmaq üçün “İbuprofen” və “Parasetamol” dərmanlarından istifadə etmək olar. “Aspirin” və bu tərkibli dərmanların istifadəsi isə məqsədəuyğun deyil. Əgər ehtiyac yaranarsa, qalan müalicəni həkim nəzarəti altında keçirə bilərlər.
Diareya, ağ ciyərdə pnevmaniyanın bakterial ağırlaşmasının meydana çıxması baş verərsə, yaxşı olar ki, şəxs xəstəxanada müalicə alsın. Amma vaxtında profilaktik tədbirlər görməklə, ən azı maskadan istifadə etməklə və məsafə saxlamaqla infeksiyanın qarşısını almaq mümkündür. Xəstəliyin yayıldığı və digər şəxsin yoluxduğu təqdirdə müalicə alsınlar ki, xəstəlik daha da ağırlaşmasın”.
Qeyd edək ki, “donuz qripi” xəstə heyvanlarla təmas və xəstə insanlarla kontakt zamanı yoluxur. Bəzən insanlar yoluxanda hiss etmirlər, müəyyən zaman sonra büruzə verir. Xüsusi risk qrupunda olan xəstələrdə ağır vəziyyət müşahidə olunur. Onlar əsasən 2 yaşa qədər uşaqlar, hamilə qadınlar, yaşı 65-dən çox olanlar, xroniki xəstəliyi olanlardır.
Oğuz Ayvaz