ABŞ-ın Beynəlxalq İnkişaf Agentliyinin (USAID) maliyyələşdirdiyi və Ümumdünya Səhiyyə Təşkilatının (ÜST) Səhiyyə Nazirliyi, İcbari Tibbi Sığorta üzrə Dövlət Agentliyi (İTSDA) və TƏBİB-lə əməkdaşlıqda həyata keçirdiyi “Azərbaycanda pandemiyaya cavab tədbirləri” layihəsi çərvəsində “Təcili yardım sistemlərinin (TYS) təkmilləşdirilməsi üzrə hibrid simpozium” keçirilib.
Ednews xəbər verir ki, “Azərbaycanda pandemiyaya cavab tədbirləri” layihəsinin əsas fəaliyyət istiqmətlərindən biri TYS və xidmətlərinin, bu sahədəki təlimlər və standartların təkmilləşdirməsinin dəstəklənməsidir. Bu məqsədlə layihə çərçivəsində 12 dekabrda “Azərbaycanda TYS-nin təkmilləşdirilməsi həftəsi tədbirləri” başladılıb. 18 dekabradək davam edəcək həftənin məqsədi TYS sahəsində Azərbaycanın gələcəyə baxışını müzakirə etmək, bu sahədə təlimlər keçmək, eləcə də, insanların həyatını xilas etmək üçün kardiopulmonar resusitasiya (KPR) vərdişlərinin öyrənilməsinin vacibliyi haqqında ictimaiyyəti məlumatlandırmaqdır.
Qeyd edilən həftə tədbirlərinin bir hissəsi kimi Azərbaycan Tibb Universitetində baş tutan simpoziumun açılışında universitetin rektoru Dr. Gəray Gəraybəyli, USAID-in Missiya direktoru Maykl Nirbas (Michael Nehrbass), Səhiyyə Nazirinin müavini Dr. Nadir Zeynalov, TƏBİB-in Tibbi Fəaliyyətin Təşkili Departamentinin rəhbəri Dr. Teymur Mirzəbəyli və ÜST-nin Azərbaycandakı nümayəndəsi Dr. Hande Harmancı çıxış edib. Simpoziumda təcili yardım şöbələrinin müdirləri, həkimləri və digər səhiyyə işçiləri, eləcə də Səhiyyə Nazirliyi, Fövqəladə Hallar Nazirliyi, İTSDA və TƏBİB-in bu sahə üzrə qərarvericiləri, xəstəxana direktorları, universitet müəllimləri və beynəlxalq təşkilatların əməkdaşları iştirak edib. Hibrid formatda keçirilən simpozium 200-dən çox iştirakçı ilə yanaşı “Zoom” platformasındakı izləyicilər tərəfindən də dinlənilib.
Qeyd edək ki, həftə çərçivəsində son 4 gün ərzində 70-dən çox səhiyyə və qeyri-səhiyyə işçisi Yeni Klinika, Kliniki Tibbi Mərkəz və Sumqayıt Təlim, Simulyasiya və Qiymətləndirmə Mərkəzindəki təlimlərə qatılıb. Simpozium və 17 dekabra nəzərdə tutulan işçi qrupu görüşləri təcili tibbi yardım işçilərinin, səhiyyə orqanlarının, qərar qəbuledici şəxslərin və ictimaiyyətin bu səhədə birgə çalışmasının təşviqinə yardımçı olacaq.
Həftə 18 dekabrda “Dəniz Mall”da keçiriləcək KPR vərdişlərinin öyrənilməsinin təbliğinə həsr edilən təlim və icmalarla iş günü ilə yekunlaşacaq.
