Son zamanlar ucuz dərmanların demək olar ki, apteklərdən “ayağı” çəkilib. Əsasəndə valideynlərin narazılıqları artıb. Belə ki, Panadol, Nurofen kimi uşaqlar üçün olan hərarət salan siroplar demək olar ki, ölkəyə gətirilmir. Bu isə valideynlər üçün çətinlik yaradır.
Bəs, başqa hansı dərman preparatları apteklərdən yoxa çıxıb?
Ednews məsələ barədə araşdırma aparıb. Şəhər apteklərin birində əczaçı çalışan Abbasova Nigar redaksiyamıza bildirib ki, son zamanlar bir çox dərmanlar artıq satışa çıxarılmır. Onun sözlərinə görə, “itən” dərmanlar isə əsasən ucuz olan preparatlardır.
“Mən bu preparatların bəzilərinin adını sadalaya bilərəm. Ümumiyyətlə, bu dərmanlar depolara gəlmir, satışı dayandırılıb. Sintomisin emulsiya, Benzil benzoat maz, Natri xlor 200 qr, mədə üçün Smekta toz, doksasiklin həb bu preparatlardandır. Nurofenin nə həbi, nə də siropu satışda yoxdur. Həmçinin də digər hərarət salan Panadol siropu da satışdan yığışdırılıb. Biz depolardan bunların nədən olmadığını soruşduqda bildirirlər ki, ümumiyyətlə bu dərmanların ölkəyə gətirilməsi dayandırılıb”.
O, həmçinin bildirib ki, son vaxtlar qrip, soyuqdəymə və boğaz ağrısına qarşı, eləcə də immuniteti artıran preparatlara tələbat çox olsa da, depolarda belə dərmanlar tapılmır.
Ölkədə dərman qıtlığına səbəb nədir? Məsələ ilə bağlı Səhiyyə Nazirliyi Analitik Ekspertiza mərkəzindən Ednews-a verilən məlumata görə, dərman vasitələrinin idxalı ilə özəl şirkətlər məşğul olur. Onun sözlərinə görə, yalnız dərman vasitələrinin keyfiyyətinin laborator analizi və sənədlərini uyğunluğunu yoxlamaq qurumun səlahiyyətindədir.
“Bu gün dünyada baş verən qlobal proseslər enerji daşıyıcılarının qiymətinin artmasına, logistika xərclərinin və xammalın qiymətinin qalxmasına səbəb olur. Eyni zamanda müharibə, logistik marşutların dəyişməsi, istehsal xərclərini artırır və nəticədə qlobal təchizat zəncirində qırılmalar müşahidə olunur. Bu proseslər Azərbaycana da təsir edir. Nəzərinizə çatdırırıq ki, bəzi dərman vasitələrinin qıtlığı təkcə bizim ölkədə yaşanmır. Avropa, Rusiya və Türkiyə bazarlarında da müəyyən dərmanların çatışmazlıqları var ki, bunun da səbəbi qeyd etdiyimiz qlobal proseslərdir. Belə bir vəziyyətdə Azərbaycan hökuməti də yarana biləcək risklərin minimallaşdırılması üçün tədbirlər görür”.
Verilən məlumat da həmçinin qeyd edilir ki, Azərbaycan dərman vasitələrində idxaldan asılı ölkədir, istehsal sahələri yeni qurulmağa başlayır.
“Ölkə rəhbərliyinin, şəxsən cənab Prezident İlham Əliyevin tapşırığı ilə Pirallahı və Ələt Azad iqtisadi Zonasında bu istiqamətdə işlər aparılır, qısa müddətdə Azərbaycanın özünü bəzi dərman vasitələri ilə təmin edə bilməsi üçün zəruri addımlar atılır. Bundan əlavə, Azərbaycan Respublikası Nazirlər Kabinetinin müvafiq Sərəncamı ilə “Əczaçılıq sektorunun inkişafı üzrə Komissiya” yaradılıb. Komissiya tərəfindən hazırlanmış qanunvericilik təşəbbüsləri hökumətə təqdim edilib. Razılaşdırılmış təkliflər hazırda yekunlaşma mərhələsindədir”.
Aynurə İsmayılqızı