Dövlət Statistika Komitəsi yeni rəqəmlər açıqlayıb.
Statistikaya əsasən, ötən il 1 yaşadək ölən uşaqların cəmi sayı 959 nəfər olub. Bunlardan 392 nəfəri perinatal dövrdə yaranan bəzi xəstəliklərdən vəfat edib.
Ednews xəbər verir ki, tənəffüs sistemi xəstəlikləri, anadangəlmə anomaliyalar, deformasiyalar və xromosom pozuntuları, bəzi infeksion və parazitar xəstəliklər, sinir sistemi, həzm sistemi xəstəlikləri, zəhərlənmələr vəfat səbəbləri arasındadır.
Perinatal dövrdə qadınlar nəyə diqqət etməlidir?
Sualımızı pediatr-endokrinoloq Sevda Novruzova cavablayıb. O, Ednews-a açıqlamasında bildirib ki, son illərdə bir yaşadək uşaqlar arasında ölüm hallarının sayı artıb.
“Buna daha çox perinatal dövrdə rast gəlinir. Perinatal dövr hamiləliyin 22-ci həftəsindən, yəni 154-cü günündən başlayaraq doğuşdan sonrakı 7 günlük müddəti əhatə edir. Bu dövrdə baş verən ölüm hallarına səbəb olan xəstəlikləri yaradan bir neçə faktor var. Bunlardan biri uyğun olmayan pəhrizdir. Xanımlarımız arasında bu, son illər sanki dəb halını alıb. Həm də bir endokrinoloq kimi vurğulamaq istəyirəm ki, dieta ac qalmaq demək deyil. Arıqlamaq istəyən insanlar isə səhvən belə düşünür. Tam əksinə, sağlam pəhriz sadəcə müəyyən, yəni orqanizmdə piylənməyə səbəb olan qidaların rasiondan çıxarılmasıdır. Amma vitamin və minerallarla zəngin qidalar artırılmalıdır. Bəzi xanımlar daim pəhriz saxlayır, yemək yemir, özlərini aclığa öyrəşdirirlər. Bu təmamilə yanlışdır. Orqanizmində vitamin və mineral çatışmazlığı olan qadınlarda hamilə vaxtı müəyyən xəstəliklər yaranması ehtimalı yüksəkdir”.
S.Novruzova qeyd edib ki, hüceyrə daxili infeksiyalar da körpələrin ölüm səbəbləri arasındadır.
“Kişidən qadın bətninə müxtəlif infeksiyalar keçə bilər. Xlamidioz, mikoplazma, qardnerella kimi infeksiyalar ilkin olaraq ginekolq müayinəsində yoxlanılır. Bəzi hamilələr ginekoloji müayinəyə 4-5-ci aylarda, hətta son ərəfələrdə müraciət edir. Hamiləliyə hazırlıq dövründə bu infeksiyaların olub-olmaması mütləq yoxlanılmalıdır. Gənc cütlüklərin nəzərinə çatdırmaq istəyirəm ki, əgər sağlam körpə dünyaya gətirmək istəyirlərsə, hamiləliyə hazırlıq dövründə həkimə müraciət etsinlər. Ginekoloji, endekrinoloji və digər müayinələrdən keçmək şərtdir. Əks halda bu və ya digər xəstəliklər nəticəsində körpə perinatal dövrdə vəfat edə bilər”.
S.Novruzova son olaraq vurğulayıb ki, qadınlar hamiləlik dövründə həyat tərzlərinə xüsusi diqqət etməlidirlər.
“Spirtli içkilərin qəbulu, siqaret və tütün məhsullarından istifadə və digər zərərli içkilər, qidalar hamilələrdə və körpələrdə xəstəliklərin əmələ gəlməsinə və bədbəxt hadisələrə səbəb ola bilər”.
Törə Zeynal
