Hindistanda sevgilisini daha çox görə bilmək üçün təyyarənin tualetinə "Təyyarədə 12 quldur və partlayıcılar var" yazılmış kağız qoyan bir iş adamına ömürlük həbs cəzası verilib.
APA “BBC news”a istinadən xəbər verir ki, Birju Salla sevgilisini Mumbaya köçməyə razı sala bilmədiyi üçün onun çalışdığı təyyarə şirkətinin imicini zədələmək və sevgilisinin işsiz qalmasına nail olmaq üçün belə hərəkət etdiyini açıqlayıb.
Məhkəmə ona 720 min dollar təzminat cəzası da kəsib.
2017-ci ilin oktyabr ayında Yeni Delhi-Mumbay reysi üzrə uçan "Jet Airways" təyyarəsi Sallanın məktubu ucbatından təcili surətdə başqa bir şəhərə enmək məcburiyyətində qalmışdı.
Hindistanlı iş adamı saxta xəbərdarlıq məktubu vasitəsilə "Jet Airways"-in Delhi uçuşlarını ləğv etməsini və bu şirkətdə stüardessa olaraq çalışan sevgilisinin Mumbayda onunla birlikdə yaşamasını təmin etmək istəyib.
Birju Salla Hindistanda təyyarə qaçırma cəzasının ağırlaşdırıldığı yeni qanunla ittiham edilən və cəza alan ilk şəxsdir. Yeni qanunla təyyarə qaçırmağa görə minimum cəza ömürlük həbsdir, bəzi hallarda edam cəzası da verilə bilər.
Salla xəbərdarlıq məktubunu iş yerindəki kompüterində yazdığını etiraf edib. Məktubda "Təyyarədə 12 quldur və partlayıcılar var. Təyyarəni Kəşmirə (Kəşmirin Pakistan idarəçiliyində olan hissəsinə) endirin" yazılıbmış.
Məktub tapılandan sonra təyyarə təyinat nöqtəsindən 778 kilometr aralıdakı Əhmədabad şəhərinə təcili eniş etməli olub.
Məhkəmə qeydlərində Sallanın evli olduğu, o dönəmdə Yeni Delhidə yaşayan stüardessayla sevgi əlaqəsinə girdiyi yazılır. İstintaqı aparmış müstəntiq Fransa informasiya agentliyi AFP-yə açıqlamasında bildirib ki, Salla təyyarəni qaçırmaq istəməyib, amma Hindistan qanunlarına görə təyyarə qaçırmaq təhdidi də təyyarə qaçırmaq cəhdi kimi qiymətləndirilir.
Sallanın ödəyəcəyi təzminat təyyarənin pilotlarına, ekipaj üzvlərinə və sərnişinlərə paylanacaq. Pilotların hər biri təqribən 1500 dollar, ekipaj üzvləri 750 dollar, sərnişinlər isə 375 dollar alacaq. Sallanın vəkili Rohit Verma qərardan apelyasiya şikayəti verəcəklərini açıqlayıb.
Bir zamanlar Hindistanın ikinci böyük aviaşirkəti olmuş "Jet Airways" maliyyə böhranı ucbatından bu ilin əvvəllərində bütün uçuşlarını təxirə salmışdı.
