Dubay hakiminin Londonda gizlənən həyat yoldaşı Şahzadə Həya bint Hüseyn - KİMDİR? - FOTOLAR | Eurasia Diary - ednews.net

20 Oktyabr,


Dubay hakiminin Londonda gizlənən həyat yoldaşı Şahzadə Həya bint Hüseyn - KİMDİR? - FOTOLAR

Maraqlı A- A A+

Oksford Universitenin məzunu, Haşimilər sülaləsinin üzvü, Dubay hakiminin həyat yoldaşı Şahzadə Həya

Bir neçə gündür dünyanın bir çox KİV-ləri "Dubay hakimi Məhəmməd bin Raşid Al Maktumun həyat yoldaşının qaçması", onun Avropa ölkələrindən birində yaşaması və Dubay hakiminindən boşanma iddiası qaldırması haqqında yazır. 

Şahzadə Həya, Almaniyada sığınacaq tələb etmiş və buna prinsipial razılığa nail olmuşdur. Sosial şəbəkələrdə yayılan məlumatlara görə, o, İngiltərədədir, 11 yaşlı  qızı Cəlilə və 7 yaşlı oğlu Zayed ilə Londonda gizli bir yerdə yaşayır.

Həya xanımın ötən ay İngiltərədə keçirilən atçılıq müsabiqəsində 69 yaşlı həyat yoldaşı Məhəmməd bin Raşid ilə yanaşı olmaması da diqqəti cəlb etmişdir, belə ki, onlar həmişə bu cür tədbirlərdə birgə iştirak edərdilər.

Geri qaytarmaq cəhdləri:

 

Şahzadə Həya bint əl-Hüseyn Oksfordun məzunudur

Media qaynaqları Şeyx Məhəmməd bin Raşidin Əbu Dabinin Şahzadəsi və Birləşmiş Ərəb Əmirlikləri Dövlətinin faktik hökmdarı Məhəmməd bin Zayedlə birlikdə Atçılıq yarışlarının açılışından əvvəl Almaniyaya səfər etməsi, bu səfərin uğursuzluqla başa çatması və Almaniya hakimiyyət orqanlarının Şahzadənin geri qaytarılması ilə bağlı tələbi qəbul etməməsi barədə xəbərlər də yayırlar. Bir çox xəbər mənbələrinə görə, BƏƏ-dəki bir Alman diplomatı Şahzadə Həyanın Dubaydan qaçmasına yardımçı olmuşdur.

Məhəmməd bin Raşidin KİV-lər tərəfindən geniş yayımlanan qəzəb və hüznlə dolu  qəsidəsi belə iki tərəf arasında barışıq yarada bilmədi.

Qeyd edilməlidir ki, Məhəmməd bin Raşid 6 dəfə evlənmiş, onun 23 övladı vardır.

Qərb mediasında Ərəb, xüsusilə Körfəz ölkələrində yüksək divarlar əhatəsində yaşayan hökmdar ailələrinin sirlərlə dolu həyatı barədə müfəssəl məlumatlar nəşr olunur.

Ana itkisi

45 yaşındakı Şahzadə Həya İngiltərədə xüsusi orta məktəblərdə oxuduqdan sonra İngiltərə və xarici ölkələrdə gələcək siyasətçilərin yetişdiyi Oksford Universitetində təhsil almışdır. O, İordaniya hökmdarı Abdulla  bin əl- Hüseyinin atabir bacısıdır, anası Kraliça Aliya 1977-ci ildə vertolyot qəzasında həlak olmuşdur. 

Ərlə arvad Britaniyada keçirilən atçılıq yarışlarında həmişə birlikdə olmuşlar

Şahzadə Həya hələ uşaq yaşlarından, anasını itirəndən sonra atçılıqla məşğul olmuşdur. 2014-cü ildə ABŞ-ın CNN kanalına müsahibəsində demişdir ki, anasını itirdikdən sonra kədər və hər şeyə antipatiya hisslərilə dolu, atlarla bağlı bir həyat sürmüşdür.

1992-ci ildə Dəməşqdə keçirilən VII ərəb oyunlarında iştirak edərək bürünc medal qazanmışdır. 2000-ci ildə Sidney olimpiadasında İordaniyanı təmsil etmiş, iki il sonra isə İspaniyada təşkil olunmuş Beynəlxalq atçılıq yarışlarında  maneələri dəf etmək müsabiqəsində ölkəsinin şərəfini qorumuşdur.

2004-cü ildə Şahzadə Həya Məhəmməd bin Raşidlə ailə həyatı qurmuş, ondan iki övladı dünyaya gəlmişdir, 2014-cü ilə kimi 8 il ərzində ardıcıl şəkildə Beynəlxalq atçılıq idmanı federasiyasına rəhbərlik etmişdir.

Bir müddət Dubayda Atçılıq klubunun sədri olmuşdur. Keçən yanvar ayında instiqramında yaydığı videoda atçılıq idmanına qayıtdığını bildirmişdi.

Altı yaşı olanda atası Hüseyn Həyaya at hədiyyə etmişdi

Qeyd edilir ki, Məhəmməd bin Raşid Britaniyada ən böyük atçılıq təsərrüfatına sahibdir, bu sahəyə qoyduğu investisiyanın məbləği bir neçə milyard funt sterlinglə ölçülür.

Deyli Teleqraf qəzeti yazır ki, Məhəmməd bin Raşidin İngiltərənin Nyumarket bölgəsində yerləşən atçılıq ferması dünyanın ən nəhəng təsərrüfatıdır, buranın 1500 işçisi vardır, 4500 at saxlanılır, sahəsi tövlə ilə birlikdə 10 min fəddandır.

 

BBC,  Ərəb redaksiyası.

Ərəb dilindən tərcümə edən fəlsəfə doktoru Zakir Qasımov

Eurasia Diary

Mətndə səhv varsa, onu qeyd edib Ctrl+Enter düyməsini basaraq bizə göndərin.

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan


Загрузка...