Bir insanın şəkər istifadəsindən tamamilə imtina edə biləcəyi ehtimalı azdır, çünki o, əksər qidalarda olur.
Ednews xəbər verir ki, şəkər həm zərərli, həm də faydalı məhsullardan biri hesab olunur. Mütəxəssislər cəmi 30 gün ərzində şirniyyatlardan (konfet, şokolad, qazlı su və s.) imtinaya görə insan orqanizmində nələrin baş verəcəyini bildiriblər.
Şəkərdən imtina əvvəlcə əhval-ruhiyyəyə təsir edir. Bildiyimiz kimi, şəkərin əhval-ruhiyyəni yüksəltmək xüsusiyyəti var. Ancaq mütəxəssislər hesab edir ki. o, həm də əhvalın aşağı düşməsinə səbəb olur. Tədqiqatlar göstərib ki, şirniyyata düşkün olan insanlar depressiv pozğunluqlardan daha çox əziyyət çəkirlər.
İkincisi, şəkərdən imtina edən insanlar daha az xəstələnirlər. Belə ki, yüksək qan şəkəri xroniki iltihaba gətirib çıxarır və müxtəlif patogenlərin inkişafı üçün əlverişli mühit yaradır.
Üçüncü və ən geniş yayılan səbəb isə çəki ilə bağlıdır. Belə ki, şəkərdən imtina çəkinin azalmasına gətirib çıxarır. Mütəxəssislərin fikrincə şəkərli qidalar yüksək kalorili olsa da qidalandırıcı deyil. Bu, insanı daha tez-tez yeməyə vadar edir. Qəbul edilən şirniyyatların miqdarını azaltmaqla, daha çox zülal, yağ və yavaş karbohidratlar istehlak etmək insanı daha uzun müddət tox tutur və daha tez doyurur.
Həddən artıq şəkər qəbulunun dişlərə vurduğu ziyanı isə bilməyən yoxdur. Belə ki, şəkər diş ətində boşluqların yaranmasına səbəb olur və ağız boşluğunda bakteriyaların sayının artmasına gətirib çıxarır. Şirniyyatdan imtina isə dişlərin, diş ətlərinin vəziyyətini normallaşdırır.
Qeyd edək ki, həddindən artıq şəkər qəbulu yuxuya mane olan və yuxunun keyfiyyətini pozan stress hormonu kortizolun səviyyəsini artırır.
