Müasir dövrün ən dəbdə olan trendləri arasında pəhrizlərin xüsusi yeri var. Statistikaya görə, insanların böyük əksəriyyəti heç olmaya həyatlarında bir dəfə də olsa pəhriz saxlayır.
Bəzən insanlar kortəbii pəhrizlərə riayət edərək sağlamlıqlarına böyük zərər vururlar. Mütəxəssislər pəhrizin xüsusi olaraq həkim nəzarətində həyata keçirilməsini daha uyğun hesab edirlər.
Hazırda daha populyar olan və əsasən də qadınlar arasında yayılan Dükan, Keta, İsveç, Norveç, qan qrupuna uyğun qidalanma rejimləri var. Bunlardan ən məşhuru isə qan qrupuna görə olan pəhrizdir.
Bu pəhriz nə zaman yarandı?...
Qan qrupuna görə pəhriz fikri ilk dəfə naturopat Peter J. D'Adamo tərəfindən irəli sürülüb. Bu qidalanma prinsipinə görə qəbul etdiyimiz qidalar qan qrupumuza uyğun olaraq orqanizmimizdə kimyəvi reaksiya əmələ gətirir. Qan qrupuna uyğun saxlanılan pəhriz daha effektiv şəkildə həzm etməyə kömək edir. Həmçinin bu cür pəhrizləri tətbiq edən şəxslərin daha effektiv çəki atmağı, daha çox enerji qazanacağı və xəstəlik riskinin azalacağı iddia edilir.
0 (I qrup) Qan qrupu:
Bu qan qrupu vəhşi heyvanları ovlayan və onların əti ilə qidalanan ilk insanlara məxsusdur. Ona görə də qırmızı ət bu qan qrupu olan insanların heç vaxt imtina edə bilməyəcəyi qidalardan biridir. A qrupundan fərqli olaraq, bu qan qrupuna sahib olanlar arıqlamaq üçün taxıl və taxıllı qidalardan uzaq durmalıdırlar.
Bu qrupa daxil olan insanlar ət yeməyi sevirlər və həzm sistemləri sağlam və aktivdir. Pəhriz saxlamağa və ətraf mühitə uyğunlaşmaqda çətinlik çəkirlər və enerjili, incə qalmaq üçün maddələr mübadiləsini sürətləndirilməsi əsasdır.
I qrupa daxil olan insanlar qırmızı ət, qaraciyər, quş əti, balıq, dəniz məhsulları, yodlaşdırılmış duz, ispanaq və brokoli kimi qidalardan istifadə etməlidirlər.
Onlar, həmçinin, taxıl, çörək, buğda (buğda unundan qaçmaq lazımdır, çünki buğdanın tərkibindəki qlüten 0-cı qrupdakı insanların arıqlamasına mane olur), süd məhsulları, yumurta və yağdan (xüsusilə zeytun yağı) istifadə etməməlidirlər.
A (II qrup) qan qrupu:
A qrupunun əcdadları ilk vegetarianlar hesab olunur. İnfeksiyalara qarşı dözümlü olan bu qrupdakı insanların vəba, çiçək kimi xəstəliklərdən sağ qaldıqları araşdırmalarla sübut edilib. Bu gün Qərbi Avropada ən çox yayılan bu qan qrupuna Aralıq dənizi, Adriatik və Egey bölgələrində yaşayanlarda daha çox rast gəlinir. Şərqi Asiyada A qrupunun ən çox mövcud olduğu ölkə isə Yaponiyadır.
Bu qrup insanların həzm sistemi həssas olur, müəyyən edilmiş qidalanmaya və ətraf mühit şəraitinə asanlıqla uyğunlaşır. Sözügedən insanlar güclü və sağlam qalmaq üçün tərəvəz əsaslı pəhrizlərə üstünlük verməlidirlər.
II qan qrupuna sahib olan insanlar soya zülalları, taxıl məhsulları, tərəvəzlər, balıq və ya toyuq, tərəvəzlər (daha çox çiy və ya buxarda hazırlanmış), brokoli, yerkökü, balqabaq, ispanaq, sarımsaq, gavalı, albalı kimi meyvələrlə qidalanmalıdırlar.
Bu qrupa daxil olan insanlar qırmızı ət yeyərkən özlərini ağır hiss edir və enerji itirirlər. Həmçinin ət onların orqanizmində yağ kimi depolanır, süd məhsulları isə maddələr mübadiləsini ləngidir. Həmçinin II qan qrupuna sahib olan insanlara kolbasa məmulatları, bibər, pomidor, kartof, kələm, tropik meyvələr, naringi, portağal kimi sitrus meyvələrindən də uzaq durmaq tövsiyə edilir.
B (III qrup) qan qrupu:
Bu qan qruplarının həzm sistemi digərləri ilə müqayisədə daha möhkəmdir. Ümumiyyətlə, bu qrupun insanlarına fiziki və zehni fəaliyyətlərini balanslaşdırmaq tövsiyə olunur.
B qan qrupuna daxil olan insanlar daha çox süd məhsulları, mal əti, hind toyuğu, balıq (lobster, karides, kalamar və midye istisna olmaqla), zeytun yağı, yaşıl yarpaqlı tərəvəzlər, kartof, kələm və göbələk kimi qidalara meyl etməlidirlər.
Onlara qarğıdalı, buğda, mərci, fındıq, küncüt, quzu, dovşan, toyuq əti, küncüt günəbaxan, qarğıdalı yağları kimi qidaların qəbulu isə məsləhət deyil.
AB (IV qrup) qan qrupu:
A və B qruplarının qarışığından ibarət olan bu qan qrupuna çox nadir insanlarda rast gəlinir. Bu qan qrupu Şərqlə və Qərbin qarışan genləri nəticəsində əmələ gəlib. Eramızdan əvvəl 900-cü ildən formalaşan AB qrupuna dünyadakı insanların yalnız 5%-i daxildir. Bu qrupdakı insanların immun sistemi çox güclüdür.
A və B qrupları üçün uyğun olmayan qidalar bu qrup üçün də əlverişsizdir.
AB qrupuna daxil olan insanlar daha çox pomidor, dəniz məhsulları, süd məhsulları, tərəvəzlər, qoyun, dovşan və hinduşka əti, qatıq, yumurta kimi qidalara üstünlük verməlidirlər.
Bu qrup sahiblərinə dana və ya mal əti, toyuq əti, sarımsaq, istiot, sirkə kimi qidalar isə məsləhətli deyil. Çünki bu ətlər orqanizmdə artıq piy kimi depolana bilər.
Nəzrin Beydiyeva, Ednews.net