İnternetin və sosial medianın inkişafı gündəlik həyatımızı asanlaşdırsa da özü ilə birgə bir sıra təhlükələr də gətirir. Son zamanlarda məşhurlaşan, xüsusilə də uşaqların sevimlisinə çevrilən internet oyunları belə təhlükələrdən hesab edilir. Valideynlərin fikrincə, övladlarının öz otaqlarında oyun oynayaraq vaxt keçirməsi küçədə dostları ilə oynamasından daha təhlükəsizdir.
Ancaq, həqiqət o qədər də ürəkaçan deyil.
Son zamanlar internet portalarında bir insanın digərini boğmağa sövq edərək müvəqqəti huşsuzluq və başgicəllənmə ilə nəticələnən boğulma oyunu sürətlə yayılmaqda davam edir. Verilən rəsmi məlumata əsasən bir çox uşaq məhz bu səbəbdən dünyasını dəyişib.
Ednews uşaqları intihara sövq edən oyunlarla bağlı araşdırmanı təqdim edir:
Alov pərisi…
“Fire Fairy” adlandırılan bu oyunun hədəf kütləsi daha çox kiçik uşaqlardır. Alov pərisi uşaqlara təhlükəli göstərişlər verərək onların həyatını riskə atır. Belə ki, bu oyunu oynayan uşaqlara evdə tək olduqları zaman mətbəxdəki təbii qazı yanılı qoyub yatmaq təlimatı verilir. Oyun, bu yolla uşaqların alov pərisinə çevrilə biləcəyini vəd edir.
Daily Mail-in xəbərinə görə, beş yaşlı qız bu hadisənin qurbanı olub və internetdə söz verildiyi kimi “alov pərisinə” çevrilə biləcəyini düşünərək bədənində ağır yanıq xəsarətləri dəyib.
Mavi balina…
Sözügedən intihar oyunu, xüsusi idarəetmə metodu ilə uşaqları və yeniyetmələri bir sıra çətinliklərlə üzləşməyə məcbur edir. “Mavi balina” bütün dünyada, xüsusilə də Rusiyada yüzlərlə yeniyetmənin intiharına səbəb olub. Gündəlik missiyalardan ibarət olan və 50 günü əhatə edən oyunun ən son tapşırığı özünəqəsddir.
Qeyd edək ki, ötən ilin iyun ayında 21 yaşlı rusiyalı Filip Budeykin oyunun təşkilatçısı olduğu iddiası ilə həbs edilib. O, 16 məktəbli qızı intihara təhrik etməkdə ittiham olunub.
Darçınla meydan oxuma…
Bu oyun daha çox "youtube" portalı vasitəsilə oynanılan və bir çox insanın xəsarət alması ilə nəticələnən oyunlardandır. Belə ki, oyunçu göstərişə əsasən 60 saniyə ərzində bir qaşıq darçını udmağa çalışmalıdır.
Qeyd edək ki, bu kimi fəaliyyətlər boğazın qıcıqlanması, tənəffüs problemi və hətta ağciyərlərin zədələnməsinə də səbəb ola bilər.
“Məryəm” oyunu…
Onlayn oyun meşədə itmiş bir uşağın evə qayıtmasına kömək məqsədilə yaradılıb. Zaman keçdikcə Məryəm psixoloji səs effektlərinin müşayiətilə oyunçulara şəxsi suallar ünvanlayır və onların psixi sağlamlığına təsir edir.
Çarli oyunu…
Adətən qələm və ağ vərəqlə "youtube" vasitəsilə oynanılır. Belə ki, vərəqin iki xanasında "xeyr", ikisində isə "bəli" sözləri yazılmaqla 4 kvadrata bölünür. Bu yolla oyunçular iblis Çarliyə suallar ünvanlayıb cavab almağa çalışırlar. Bu prosses isə qeydə alınır və ekranda paranormal hadisələr əks olunur.
Nəzrin Beydiyeva