Qətərli gənc Qənim Əl-Müftəh dekabrın 18-dək davam edəcək 22-ci futbol üzrə dünya çempionatının möhtəşəm açılışında iştirak edib. Gənc burada böyük maraqla qarşılanıb.
Ednews xəbər verir ki, Əl-Müftəh mərasimə Qurani-Kərimdən bir ayə oxumaqla başlayıb. Daha sonra məşhur kino ulduzu Morqan Frimanla birlikdə səhnəyə çıxıb.
Anadangəlmə "kaudal reqressiya" sindromlu gənc 2002-ci ilin may ayında Qətərdə anadan olub. Bu sindromla yaşamağına baxmayaraq, o, heç zaman ümidsiz olmayıb.
Əl-Müftəh bu barədə müsahibələrinin birində deyib:
“Mən bədənimin dörddə biri ilə yaşasam da, bu həyatda xoşbəxt olmağıma heç bir vaxt mane olmayıb. Uşaqlıqdan bəri dəyişdirilə bilməyən şeylərlə barışmağı öyrənmişəm. Həmd olsun Allaha”.
Əl-Müftəh həyata müsbət baxışını anasına bağlayır, əzm və səbri isə atasından öyrəndiyini vurğulayır.
Sözügedən gənc əla skeytbordçudur və dostları ilə özünəməxsus şəkildə futbol oynayır.
Anasından ilhamlanan Əl-Müftəh “Jareesah Ice Cream” adlı layihəsi ilə dondurma şirkətini quraraq, sahibkarlıqla məşğul olur. Bu gün onun şirkətinin 6 filialı və 60-dan çox işçisi var.
Qeyd edək ki, o, həmçinin, ölkəsindəki diplomatik işlərə qoşulmaq istəyir. Əl-Müftəh 2015-ci ildə "Xeyirxah Əllər və Asiya"-nın xoşməramlı səfiri olub. 2017-ci ildə isə BMT Gənclər Forumunda iştirak edib.
Rəna Mürşüd