Zəngin insanlar bəzən dəbdəbəli zövqləri ilə diqqət çəkir. Bu şəxslərin əksəriyyəti məhz prestijli iqamətgahlarda yaşayırlar. Onların həyat tərzlərindən qaynaqlanan bu reallığa öz aralarındakı rəqabət də əlavə olunduqda yaşadıqları evlərin qiymətləri də günü-gündən çılğınlaşır.
Ednews dünyanın ən bahalı evlərini təqdim edir:
Antilia - Hindistan
Dünyanın ən bahalı evi olaraq tanınan Antilia öz dizaynı ilə görənləri heyrətləndirir. Hindistanlı iş adamı Mukeş Ambaniyə məxsus olan ev Mumbay şəhərində yerləşir. Ambani burada ailəsi ilə birlikdə yaşayır. Evin dəyəri isə 1 milyard dollardır.
Villa Leopolda - Fransa
Fransanın Vilfranş-sür-Mer şəhərində yerləşən "Villa Leopol"-un adı isə siyahıda ikinci yerdədir. Sözügedən villa həm antikliyi, həm də dizaynı ilə göz axşayır. Kral II Leopold tərəfindən 1902-ci ildə tikilən bu villanın dəyəri 525 milyon dollardır.
Penthouse One Hyde Park - İngiltərə
Siyahıda üçüncü yeri Londondakı The Penthouse One Hyde Park tutur. 200 milyon dollara satılan bu yaşayış kompleksi 86 lüks mənzildən ibarətdir.
Fairfield - ABŞ
ABŞ-ın Sauthempton şəhərində yerləşən bu ev siyahıda dördüncü yerdədir. Ümumilikdə 10.000 m² yaşayış sahəsini əhatə edən ev ABŞ-ın ən bahalı evi hesab olunur. Evin qiyməti ümumilikdə 198 milyon dollardır.
Hearst-Davies malikanəsi - ABŞ
Siyahının sonundakı ev yenə ABŞ-da yerləşir. "Xaç atası" filminin çəkilişlərinin baş tutduğu bu ev özünəməxsus görünüşü ilə məşhurdur. Beverli Hillsdə yerləşən Hearst-Davies malikanəsi Bekams və Tom Kruz kimi dünyaca məşhur ulduzların evlərinə bitişikdir. Onun qiyməti 195 milyon dollardır.
Nəzrin Beydiyeva