Hər nə qədər ağlasığmaz olduğu düşünülsə də, günümüzdə də lənətli hesab olunan yerlər var. Bunlardan bəziləri evlər, bəziləri saraylar, bəziləri isə meşələrdir. Amma siyahı təkcə adlarını çəkdiyimiz yerlər ilə bitmir. Dünyada elə adalar var ki, orada baş verən hadisələr ictimaiyyətin həm marağına, həm də qorxusuna səbəb olub.
Ednews dünyadakı lənətli adalar barədə araşdırmanı təqdim edir:
Gaiola adası
Demək olar ki, bu adada yaşayan hər bir insanın ya öldüyü, ya da boğulduğu reallığı hər kəsə məlumdur. Ona görə də Gaiola adası lənətli hesab olunur. Bir müddət Gaiola-da yaşayan insanın meyiti xalçaya bükülmüş halda aşkarlanıb. Ölən həmin insanın həyat yoldaşının isə boğularaq öldüyü deyilir. Bir qayda olaraq naməlum səbəblərdən buraya ayaq basanlar birmənalı şəkildə bədbəxt hadisələrin qurbanı olur. Belə ki, insanlardan biri infarkt keçirib, digəri psixi sağlamlığını itirib və ruhi xəstəxanada intihar edib. Qeyd edək ki, baş verən qəribə hadisələrə görə hazırda oraya heç kim üz tutmur.
Miyake-jima adası
Adada yerləşən Oyama dağı hazırda aktiv vulkandır. Vulkan son vaxtlar bir neçə dəfə püskürüb. Sonuncu dəfə 2000-ci ildə püskürən Oyama adaya davamlı olaraq kükürdlü qaz axınının gəlməsinə səbəb olub. Odur ki, ada sakinləri hər zaman yanlarında qaz maskası gəzdirirlər.
Oyuncaq gəlinciklər adası
Adanın sahibi olan Culian Santana yerli fermer olduğu zaman qəribə bir hadisəyə şahidlik edir. Balaca bir qızın boğulduğunu görən Culian bir müddətdən sonra onun gəlinciyin suda üzdüyünü görür. O, balaca qızın xatirəsinə gəlinciyi ağaca asır. Lakin həmin qızın ruhunun bu adanı təqib etdiyinə inandığı üçün adanı kuklalarla örtməyə başlayır. 2000-ci illərdə vəfat edən Culianın (1500-dən çox gəlinciyinin olduğu deyilir) asdığı gəlinciklər adada hələ də qalmaqdadır. Gəlinciklər adası turistlərə əsrarəngiz ekskursiya təklif edir.
İlha da Queimada adası
İlan adası kimi tanınan bu adada minlərlə ilan yaşayır. Dünyanın ən təhlükəli ilanlarının olduğu bu adada hər kvadrat metrə 5-ə yaxın ilan olduğu deyilir. Bundan əlavə, mülki şəxslərin adaya daxil olması, ümumiyyətlə qadağandır.
Xərçəng adası
Xərçəng köçü ilə məşhur olan və dünyada ən böyük heyvan miqrasiyasına ev sahibliyi edən ada Hind okeanında yerləşir. Məlumdur ki, hər il təxminən 120 milyon qırmızı xərçəng ada cəngəlliklərində çoxalmaq üçün uzun və çətin səyahət edir. Bundan əlavə, köç zamanı ehtiyat tədbirləri görülərək xərçənglərin sərbəst hərəkət etməsi üçün bəzi yollar bağlanır.
Nəzrin Beydiyeva