Uşaqlıqdan varlığına hamımızın inandığı - nağıl qəhrəmanı Şaxta Baba! Hər ilin sonu uşaqları hədiyyələrlə sevindirən babanı kim sevməz axı?
Dünyanın müxtəlif ölkələrində Yeni ili qeyd etmək ənənələri bir-birindən fərqlənsə də, milliyyətindən, yaşından və cinsindən asılı olmayaraq hər kəs o möcüzəni səbirsizliklə gözləyir.
Ancaq bəlkə də çoxlarınızın bilmədiyi bir sirr var. Bilirdiniz ki, hər ölkənin, hər diyarın özünə məxsus Şaxta Babası da var? Gəlin Yeni il qəhrəmanlarımızla daha yaxından tanış olaq.
Ednews sizlərə hər ölkənin öz qış qəhrəmanlarını təqdim edir:
İlk olaraq başlayaq öz yurdumuzun Şaxta Babasından.. Çox yaşlı olan bir baba və yanında gəzdirdiyi nəvəsi. Əlində əsası ilə yerə vuraraq, öz gəlişindən xəbərdar edər..uşaqlardan tutmuş böyüklərə qədər hər kəsi sevindirər.
Yaxın qonşuluqda olan Rusiyanın Şaxta Babası isə heç də bizimkindən fərqlənmir. Adı rus dilində “Ded Moroz”, geyimində isə xalatı bəzən qırmızıya, bəzən isə göyə çalar. Öz nəvəsi ilə birgə uşaqları hədiyyələri ilə sevindirər.
Biraz uzaqlara səfər etsək... “Santa Klaus” (Şimali Amerika nağıl) rast gələrik. - O, Laplandiyada yaşayır, maralların çəkdiyi kirşəyə minir, bacaları və Milad corablarına hədiyyələrini düzür. Onun əvvəlkilərdən fərqli olaraq, kifayət qədər möhkəm müasir görünüşü var: boz saç, səliqəli saqqal və bığ, qırmızı gödəkçə, şalvar, papaq, burnunda isə yumru eynək. Bu obraz 1931-ci ildə Coca-Cola reklamı üçün bir sıra şəkillər çəkən amerikalı rəssam Handon Sundblom yaratmışdı. “Santa Klaus” Kanada və Avstraliyada da(istiliyə görə o, köynək və şort geyinir) məşhurdur.
“Papa Pasquale” isə “Santa Klaus”un ən yaxın qohumu və bəlkə də ən qeyri-adi Yeni il personajlarından biridir. O, Latın Amerikasında yaşayır. Tamamilə fərqli görünüşə malik olsa da, onu yalnız dayaqlarda hərəkət etdiyi üçün tanımaq çox da çətin deyil. Sadəcə bir məqam var..Onu görən Ekvador, Kolumbiya, Kuba və Panama sakinləri heç də sevinmirlər, əksinə fit çalıb qışqıraraq, silahdan atəş açmağa başlayırlar! Səbəb isə “Pasquale” ayrılmaq istəməyən köhnə ili təcəssüm etdirir. “Papa Pasquale” atəşfəşanlıq ustasıdır, bu onun sevimli məşğuliyyətidir.
Höteyşo, Segatsu-kirşə Ojo-san isə Yaponiyaya məxsusdur. Höteyşo başının arxasında gözləri olan qədim tanrı hesab edilir. Yaponiyada hamı ona pərəstiş edir. Höteyşonun bir neçə onilliklər əvvəl də rəqibləri var idi - Seqatsu-san və Ojo-san. Yeni ilə bir həftə qalmış təbrik nitqləri ilə evlərə qonaq gələr, amma uşaqlara hədiyyələr verməz, çünki bunu valideynlər edər.
"Yul-Tomten" Milad bayramı üçün İsveç evlərinə gələn bir cırtdandır. O, uşaqlar üçün sobanın üstünə qızılla boyanmış şirniyyatlar, oyuncaqlar və yolka bəzəkləri qoyur. O, meşədə yaşayır. Qar adamı “Dusty”, cadugərlər, elflər, trollar və sehrli səltənətin digər sakinləri onun tabeliyindədir.
“Per Noell” və “Chaland” ayrılmaz fransız cütlükdür. Per Noel əlində böyük hörmə səbəti və eşşəyin üzərində yalnız çalışqan uşaqlara baş çəkərək, kamin qarşısında asılmış corablara hədiyyələr qoyur. “Chaland” isə əksinə, dəcəl uşaqların yanına gələrək onları çubuqların bir hissəsi ilə “müalicə edir”. Halbuki ona nəğmələr, şerlər oxusan, qəzəbini rəhmətə çevirib dəcəl uşaqlara hədiyyə verəcək. Yeri gəlmişkən, Per Noel ispanlara da baş çəkir.
İtalyanlar arasında Şaxta baba “Babbo Natale” ilə əvəzlənir. O, maralların çəkdiyi kirşədə uşaqlar üçün hazırladığı hədiyyələr ilə gəzər.
Hollandiyalıların qaradərili qulluqçuları ilə gəmidə üzən qara “Sinter Klaas” var.
Yunanıstanlı “Müqəddəs Basil” isə nə kirşə ilə getmir, nə də bacadan aşağı düşmür. Müqəddəs Basil keşiş paltarına bənzər müxtəlif rəngli geyimlər geyinir, başına isə tiaraya bənzər papaq taxır. “Müqəddəs Basil” hədiyyələr vermir. Onun düşüncəsinə görə ən yaxşı hədiyyə yaxşı söz, əməl və Məsihə olan imandır.
“Müqəddəs Nikolay” Belçika və Polşanın kiçik sakinlərinə sevinc bəxş edir. O, köməkçisi Peterlə birlikdə uşaqlar tərəfindən xüsusi hazırlanmış çəkmələrdə və corablara öz hədiyyələrini yerləşdirir.
Dünyanın ən təvazökar Yeni il personajı Çexiyalı “Kirpi” hesab olunur. O insanların diqqətindən qaçaraq, evlərə hədiyyələr dağıdır.
Beləliklə, “Milad Ata” (İngiltərə), “Şo Hinq”, “Şenq Dan Laojen” (Çin), “Daid-na-nolaq” - Milad Ata (İrlandiya), “Lakşmi İlahəsi” (Hindistan), "Koleda əmi" və ya "Mraz əmi" (Bolqarıstan) və daha başqaları.
Nağıl qəhrəmanlarının adları, obrazları, davranışları fərqli olsa da, onların hamısının ortaq bir cəhəti var - onlar Milad və Yeni il bayramlarının dəyişməz tərkib hissəsi və sevinc, əyləncə, ən əsası isə Dünya Uşaqlarının sevinc mənbəyidir. Axı, uşaqlar xoşbəxt olanda, bütün dünya xoşbəxt olur.
Ola bilsin ki, Şaxta Baba- Nağıl qəhrəmanlarına inanmırsız, ancaq möcüzələrə inanın. Çünki onların “olmaq” kimi bir xüsusiyyəti vardır!
Rəna Mürşüd