Artıq nə az, nə çox - düz 21 ildir ki, Mübariz Namazovun müəllifi olduğu əlavə dərs vəsaitləri istifadə edilir. Maraqlıdır ki, bütün məktəblərdə müəllimlər 5 və 9-cu sinif şagirdlərinə ancaq M.Namazovun müəllifi olduğu əlavə dərs vəsaitlərini almağı məsləhət görürülər. Bunun müəllimlər tərəfindən məcburi qaydada tətbiq edilməsi isə valideynlərdə müəyyən sualların yaranmasına səbəb olub.
Maraqlıdır, bəs yazdığı əlavə dərs vəsaitləri təhsil ekspertləri tərəfindən yüksək qiymətləndirilən M.Namazov kimdir? Niyə bütün məktəblərdə yalnız onun əlavə dərs vəsaitləri istifadə edilir?
Vikipedik tərcümeyi-hal: Mübariz Bəndi oğlu Namazov 2 dekabr 1952-ci il doğumludur. Azərbaycan Pedaqoji Rus dili və Ədəbiyyatı İnstitutunu bitirib (?). 1996-cı ildə ilk riyaziyyatdan çalışma kitablarının müəllifi olub. O vatxdan indiyə qədər M.Namazov 60-dan çox vəsaitin müəllifidir. Hazırda o, Bakı şəhəri Texniki Humanitar liseyində dərs deyir.
Yaranmış suallarla bağlı müəllifin Axar.az-a verdiyi kiçik müsahibəni təqdim edirik.
- Mübariz müəllim, niyə ümumtəhsil müəsssisələrində birmənalı olaraq sizin əlavə dərs vəsaitlərinizdən istifadə edilir?
- Məktəblərdə müəllimlərin şagirdləri mənim müəllifi olduğum vəsaitlərə yönəltməsi tamamilə onların təşəbbüsüdür. Mənim nə işimə qalıb? Mənim nə ixtiyarım var kimisə məcbur edəm? Mən o məktəblərin hər birini gəzə və təbliğat apara bilmərəm axı! Müəllimlər dərsliklərdə olan çalışmaların sayının az olmasına görə yaranan boşluğu mənim vəsaitlərimlə doldurmağa çalışırlar.
- 21 ilə 60 dərs vəsaiti çox deyil ki?
- Əgər Azərbaycanda kitab yazmaq qadağandırsa, mən bu vəsaitləri yazmayım.
- Vikipediyada sizin himanitar sahə üzrə təhsil aldığınız yazılır. Maraqlıdır, dilçi-ədəbiyyatçı necə riyaziyyat testlərini yazır?
- Mən keçmiş Lenin adına Pedaqoji İnstitutu riyaziyyat ixtisası üzrə 1980-ci ildə yüksək qiymətlərlə bitirmişəm. Vikipediyada mənimlə bağlı bu tərcümeyi-haldan məlumatsızam.
- Sizin müəllifi olduğunuz dərs vəsaitlərinin digərlərindən fərqi və üstünlüyü nədən ibarətdir?
- Mənim müəllifi olduğum dərs vəsaitlərinə üstünlüyün niyə verilməsinin səbəblərini məktəblərdə bu vəsaitlərdən istifadə edən müəllimlərdən soruşmaq lazımdır. Bu suala mən cavab versəm, öz kitabımı tərifləmiş olaram. Mənim hazırladığım vəsaitdəki çalışmalarda məntiqi fikirləşmələrə daha çox üstünlük verilib, vəsaitdəki çalışmaların quruluş sxemi sadədən mürəkkəbə doğrudur.
- Müəllimlər hər dəfə şagirdləri sizin dərs vəsaitinizin yeni nəşrini almağa məcbur edirlər. Müəllifi olduğunuz kitablar niyə hər il yenidən nəşr olunur?
- Bu, həqiqəti əks etdirməyən məlumatdır. Çünki bu vəsaitlər hər il yenilənmir. Sadəcə, Tələbə Qəbul üzrə Dövlət Komissiyasının dərsliklərdə tətbiq etdiyi yeniliklərdən sonra mənim hazırladığım vəsaitlərdə yeni varianta uyğun çalışmalar əlavə edilir. Yəni bu vəsaitlərin yenidən nəşr olunmasına səbəb kurrikulum formasının məktəblərdə tətbiq olunması ilə əlaqədardır. Bunun nəyi pisdir ki?! Eyni zamanda vəsaitlərdə yalnız qiymətləndirmə hissəsi dəyişib. Vəsaitlər bütövlükdə dəyişməyib.
- Müəllifi olduğunuz dərs tapşırığı kitablarını hansı vəsait hesabına nəşr edirsiniz?
- Mən dərs vəsaitlərinin istifadə olunması ilə bağlı heç bir məsələyə qarışmıram. Vəsaitlərimin çapı ilə özüm məşğul olmuram. Yazdığım vəsaitləri mətbəə öz hesabına çap etdirir və mən hər kitabdan yalnız 20-30 ədəd götürə bilirəm. Mən bu vəsaitlərin satışı ilə məşğul olmuram. Sadəcə bu vəsaitləri yazıram.
- Mübariz müəllim, bəs nə üçün dərsliklər yazmaq təşəbbüsünüz olmayıb?
- Dərslik yazmağa vaxtım olmayıb. Bunun başqa səbəbləri də var ki, mən onları açıqlamaq istəmirəm.