ABŞ-da azərbaycanlı Çarli Çaplin kimi tanınan "America's Got Talent" yarışmasının finalçısı Üzeyir Novruzov bu dəfə Gürcüstanın "Georgia Got Talent" müsabiqəsinə qatılıb. Üzeyir Novruzov tamaşaçıları gürcü dilində salamladıqdan sonra şousunu nümayiş etdirib. O, akrobatik hərəkətləri ilə həm münsifləri, həm də tamaşaçıları təəccübləndirə bilib. Münsiflərin dördündən də müsbət qiymət alan Üzeyir növbəti tura keçib. O, qərardan öncə qafqazlı qanı daşıdığını və əslən azərbaycanlı olduğunu da tamaşaçıların diqqətinə çatdırıb.
Aktyor müsabiqə ilə bağlı təəssüratlarını Eurasia Diary ilə bölüşüb. O bildirib ki, bu müsabiqəyə keçən il dəvət alsa da vaxt azlığından imtina edib. Bu il isə yenidən dəvət aldığında razılaşıb. Üzeyir Novruzov deyir ki, Gürcüstanda yüksək səviyyədə dəstəklənəcəyini sözün düzü gözləmirmiş. Səhnədə olan zaman Gürcüstanda yaşayan azərbaycanlılardan dəstək aldığını bildirən aktyor, buna çox sevindiyini gizlətmədi. O, noyabr ayında həmin müsabiqənin yarımfinal mərhələsində iştirak edəcəyini dedi. Özü də onun çıxışı canlı efir vasitəsilə yayımlanacaq. O ki, qaldı yarışmada qalib olub olmayacağına: “Çıxışımı sağ-salamat başa vurmaq mənim üçün qalib olmağa bərabərdir. Yarışmada istedadlı iştirakçılar çoxdur. İnşallah qismət...”-deyə o son olaraq əlavə edib.
Xatırladaq ki, ABŞ, Fransa, Almaniya və İtaliyada müxtəlif televiziya verilişlərində öz məharətini ustalıqla nümayiş etdirmiş Ü.Novruzov 2016-cı ildə nərdivan üzərində ən çox dayanan adam ünvanını əldə edərək Ginnesin Rekordlar Kitabına düşüb.