Zabit və gizirlərimizin peşəkarlığı Azərbaycan Ordusunun gücünü təsdiqləyən əsas amillərdəndir. Ordu sıralarına qədəm qoyan hər bir gəncin müqəddəs və şərəfli peşənin vərdişlərinə yiyələnməsində, müasir hərbi texnikaların sirlərinə yaxından bələd olmasında, vətənpərvər bir əsgər kimi formalaşmasında zabit və gizirlərin rolu böyükdür. Onlar Vətən sevgisinin, Vətənə bağlılığın, Vətən müqəddəsliyinin nə olduğunu əsgərlərə xidmətləri boyunca aşılayırlar. Azərbaycan əsgəri bu sevgi ilə xidmət edir.
Bu sözləri Aprel döyüşlərinin iştirakçısı Kapitan Şamil Əliyev deyib.
Hərbi xidməti təkcə vəzifə deyil, həm də amalı hesab etdiyini deyən kapitan bildirib ki, Azərbaycan Ordusu Azərbaycan xalqının güvənc yeridir. Zabit və əsgərlərə dəyanət verən, əminlik bəxş edən o inamdır. Ordumuzu Aprel zəfərinə aparan həm hərbi qulluqçularımızın yüksək döyüş və mənəvi hazırlığı, dövlətə, dövlətçiliyə sədaqəti, həm də bu inam oldu. Xoşbəxt hərbçilərdənəm ki, həmin qələbə anını yaşayanların sırasında oldum. Üçrəngli Azərbaycan bayrağının Lələtəpə yüksəkliyində dalğalanmasının qürurunu yaşadım. Lələtəpədə yaşadığım duyğular heç bir zaman yaddaşımdan silinməyəcək.
“Aprelin 1-dən 2-nə keçən gecə ermənilər artilleriya vasitəsilə kəndlərimizi atəşə tutdular. Düşmən geniş təxribatlar törədəndə hərbi hissələrimiz əks-həmlə əmri aldı. Hər bir əsgərdə, gizirdə, zabitdə çox yüksək döyüş ruhu var idi. Hər kəs inamla, ürəklə savaşırdı. Düşmənə sübut etdik ki, onlar bizim kimi döyüşə bilməzlər. Çünki biz torpaqlarımızın azad edilməsi üçün vuruşurduq. Əsgərlərimiz cəsarətlə və yüksək əhval-ruhiyyədə döyüşürdülər”, - deyə o bildirib.
Şamil Əliyev bildirib: “Biz Aprel döyüşlərində sübut etdik ki, lazımi qədər texnikamız var. Lakin biz onların hamısından, daha uzaq mənzilli silahlardan istifadə etmədik. İstifadə etdiyimiz silahların bir qismi hələ onları vahiməyə salmışdı, düşmənin yanına düşən hər bir mərmi onların əsgər və zabitlərini qorxuya salırdı. Silah-sursatlarını atıb qaçırdılar ki, canlarını qurtarsınlar.
Ali Baş Komandanımızın vurğuladığı kimi, bu gün Azərbaycan Ordusu o qədər güclüdür ki, bizim o qədər güclü texnikamız, silah-sursatımız, müasir silahlarımız var ki, düşmənin istənilən strateji və hərbi obyektini məhv etməyə, torpaqlarımızı işğaldan hər an azad edə bilərik”.
