Gürcüstan parlamentinin sədr müavini Zviad Dzidziquri Azərbaycanda işgüzar səfərdə olub. O, aprelin 11-də Azərbaycanda keçiriləcək növbədənkənar prezident seçkilərində beynəlxalq müşahidəçi qismində iştirak etmək üçün Gürcüstan parlamentini təmsil edən nümayəndə heyətinin tərkibində Bakıya gəlib.
Zviad Dzidziquri müşahidə prosesi ilə bağlı təəssüratlarını Eurasia Diary ilə bölüşüb.
"Seçki prosesinin dinc və sakit keçməsindən çox razıyıq. Seçki məntəqələrində peşəkar təlim keçmiş kadrlar çalışır. Prezidentliyə namizədlərin hamısının seçki məntəqələrində öz müşahidəçiləri və nümayəndələri var ki, bu da demokratikliyi və prosesin şəffaflığını nümayiş etdirir. Müxalifət və iqtidar partiyasının nümayəndələri yekdilliklə heç bir problem və pozuntunun olmadığını bəyan edir", - Gürcüstan parlamentinin üzvü bildirib.
O, həmçinin Gürcüstanın Azərbaycandakı seçki kampaniyasını izlədiyini də etiraf edib. O, bunu özünün şəxsən şahidi olduğu Almaniya və Fransada keçirilən oxşar kampaniyalarla müqayisə edib. Onun sözlərinə görə, həm Avropada, həm də Azərbaycanda seçkiqabağı proses təxribatlar və əlavə səs-küy olmadan sivil şəkildə keçirilir.
Natalya Quliyeva
