Oktyabrın 16-da ABŞ dövlət katibi Mayk Pompeo Səudiyyə Ərəbistanına Kral Salmanla görüşə yollandı. Görüşdə əsas müzakirə mövzusu İstanbulda Səudiyyə konsulluğunda Camal Qaşıqçının ölümü ilə bağlı məsələ idi.
Türkiyə tərəfi Qaşıqçının ölümündə Səudiyyə Ərəbistanını təqsirli sayır. Qaşıqçı Səudiyyəyə qarşı müxalif yazıları ilə məhşurlaşmış jurnalistdir. Pompeonun Səudiyyə Ərəbistanına səfərindən sonra Türkiyəyə gedəcəyi gözlənilir.
Eurasia Diary Pompeo ilə Salmanın görüşü barədə amerikalı analitik Paul Qobldan müsahibə götürüb.
Paul A. Qobl Rusiya üzrə amerikalı mütəxəssis, analitik, yazıçı və köşə yazarıdır.
Səudiyyə Ərəbistanının jurnalistin sui-qəsdində iştirak etdiyi sübut edildikdə, ABŞ və Səudiyyə Ərəbistanı arasındakı əlaqələrdə nə gözlənilir, sualına Paul Qobl bu şəkildə cavab verdi: "Mayk Pompeo Səudilərdən Qaşıqçı ilə bağlı daha çox məlumat əldə etməyə çalışacaq, lakin o, çox da təzyiq göstərə bilməyəcək, çünki Tramp silah satışından əldə olunan gəlirlərdən imtina etmək istəmir. Bundan əlavə, hələ də Səudiyyə Ərəbistanı Orta Şərqdə ABŞ-ın ən əhəmiyyətli ortağı olaraq qalmaqda davam edir", deyib.
Daha əvvəl prezident Tramp CBS-yə müsahibəsində ABŞ-ın Səudiyyə Ərəbistanına sanksiyalar tətbiq edə biləcəyini qeyd etmişdi. Buna qarşılıq olaraq, Səudiyyə Ərəbistanı isə mümkün ola biləcək sanksiyalara qarşı tədbirləri açıqladı. Səudiyyənin sahib olduğu ən güclü alət isə neft və neft qiymətidir. Onlar sanksiyalar tətbiq ediləcəyi təqdirdə qiymətlərin 200 dollara qalxa biləcəyi ilə hədələmişdi.
Paul Qobl həmçinin, hər iki tərəf arasında təzyiqlər barədə öz fikirlərini bölüşüb.
“Hesab edirəm ki, bu real danışıqlardan əvvəl gözlənilən şişirdici bəyənatlardır. Trampın vəziyyətini nəzərə alsaq, Pompeonun Riyada çox təzyiq göstərəcəyini düşünmürəm".
CNN telekanalı məlumat verib ki, 2 həftə ərzində inkar etdikdən sonra Səudiyyə Ərəbistanı Qaşıqçının ölümü ilə bağlı etiraf edəcək.
Amerikalı ekspert CNN-nin xəbərini şərh edib: “Mən düşünürəm ki, əgər onlar həqiqəti etiraf etsələr, Tramp öz siyasətini daha rahat apara biləcək”.
Müsahibəni götürdü: Əkbər Bayramov