20-24 mart tarixlərində Türkiyənin Antalya şəhərində Aşihara karate növü üzrə Avrasiya çempionatı keçirilib. Yarışda 20 ölkədən 200 idmançı iştirak edirdi. Azərbaycan komandası 11 idmançı ilə təmsil olunduğu bu yarışda tarixi rekorda imza atıb.
Belə ki, Azərbaycanı təmsil edən idmançılar 6 qızıl, 4 gümüş və 1 bürünc olmaqla ümumilikdə 11 medal qazanaraq ölkəni yüksək səviyyədə təmsil etməklə bərabər komanda reytinqində birinci yeri tutdular.
Eurasia Diary Antalyada keçirilən Aşihara Karate növü üzrə Avrasiya çempionatı barədə bu federasiyanın Azərbaycan üzrə vitse-prezidenti Vüsal Məmmədovdan müsahibə alıb.
Bundan əvvəl noyabr ayında Aktauda keçirilən yarışda da nəailiyyət qazanmaları barədə danışan federasiyanın vitse-prezidenti Vüsal Məmmədov həmin çempionatda hakimlərin qərəzli qərarları ilə üzləşdiyini qeyd etdi.
- Mətbuat konfransında hakimlərin qərəzli qərarları ilə bağlı problemləri qeyd etdiniz. Bununla bağlı ətraflı məlumat verə bilərsiniz?
- Bildiyiniz kimi, hər bir idman növündə yarışan idmançılar böyükdən kiçiyə qədər bir ailə kimi qəbul olunur. Bu ailədə də ayrıseçkilik etmək heç bir təşkilat rəhbərinə xas deyil. Bizim Aktauda keçirilən dünya çempionatında həqiqətən də idmançılarımız çox parlaq çıxış etdilər. Orda iştirak edənlərin 4-ü qızıl medala layiq görüldü. Sadəcə olaraq, iki idmançıya müəyyən səbəblərə görə medal verilmədi. Buna bürokratik məsələ yaxud ayrıseçkilik deyə bilərik. Orda dərhal bu məsələ ilə bağlı narazılığımızı bildirdik.
- Bəs bu yarışda necə, Antalyada keçirilən çempionatda istər hakim idaərçiliyi, istərsə də qidalanma baxımından problem oldumu?
- Xeyir. Antalyada keçirilən Avrasiya çempionatı çox yüksək səviyyədə təşkil olunmuşdu. Dünya Aşihara Karate AİKO Federasiyası olaraq Deyv Conkers bu yarışa çox gözəl təşkilatçılıq nümayiş etdirdi. Qeyri-məqbul qərarlar qəbul olunmadı. Bütün qərarlar istər hakimlər tərəfindən istərsə də Dünya Aşihara Karate Federasiyası tərəfindən çox düzgün, dürüst qərarlar qəbul olundu və biz komanda olaraq bütün yarışın təəssüratından məmnun qaldıq.
- Dövlətimizin Aşihara Karate Federasiyasına bu gün üçün dəstəyi hansı səviyyədədir?
- Bildiyiniz kimi dövlət rəhbərimiz cənab İlham Əliyevin idmana xüsusi olaraq dəstəyi göz qabağınadadır. Həm dövlət, həm də dövlət rəhbərimiz, Gənclər və İdman Nazirliyi də bu idman növünə çox yüksək səviyyədə dəstək göstərir. Federasiya rəhbərliyi olaraq idmançılarımız və biz dövlət rəhbərindən və dövlətimizin bizə göstərdiyi qayğıdan məmnunuq.
Əlavə olaraq, yarış iştirakçısı və Antalyada keçirilən yarışın qalibi, 24 yaşlı Aşihara Karate üzrə 3 qat Dünya Çempionu və 2 dəfə Avrasiya çempionu, Avroasiyanın 2 dəfə ən texniki döyüşçüsü seçilən Musazadə Musa Eurasia Diary-ə verdiyi müsahibədə öz təəssüratlarını bölüşüb.
- Qeyd etdiyiniz kimi, "ən yaxşı texniki döyüşçü adına layiq görülmüsünüz. Bu adı ardıcıl qazanmağınızın sirri nədədir?
- Belə deyə bilərəm ki, bunun sirri bir neçə dəfə yarışlarda iştirak etməyimdir. Əvvəl də qeyd etdiyim kimi, iştirak etdiyim 10 yarışın 8-də dünya çempionluğuna namizəd olmuşam. Yəqin ki, tək mənim yox, bütün Azərbaycan xalqının döyüş ruhu var və bu xaricilərin xoşuna gəlir. Həm super texnika, həm də sona qədər mübarizə apardığımıza görə bizi hər dəfə qalibiyyətə əsas namizəd olaraq görürlər. Fəxrlə deyirəm ki, bir neçə yarışdır biz buna nail oluruq.
- Komanda yoldaşlarınıza və bu idman növü ilə məşğul olmaq istəyən gənclərə nə məsləhət verə bilərsiniz?
- Mən Bakı şəhərində məşqçi olaraq faəliyyət göstərirəm. Həm komanda yoldaşlarıma, həm də öz tələbələrimə həmişə tövsiyə edirəm ki, sona qədər mübarizə aparsınlar. İdman elə bir sənətdir ki, yarı yolda qoysan sonradan onu davam etdirmək çətin olur. Axıra qədər onu davam etmək lazımdır ki, nailiyyət əldə edəsən. Həvəsdən düşməmək, daimi olaraq məşq etmək, mübarizə aparmaq lazımdır.
Müsahibəni götürdü: Azad Nuriyev
