Tanınmış fleyta ifaçısı Sylvain Barou balaban musiqi alətində ifa etməyi öyrənmək üçün Azərbaycana səfər edib. Onu bura Azərbaycan musiqisinə olan sevgisi gətirib. Eurasia Diary Sylvain Barou-nun karyerası və Azərbaycan musiqisinə olan marağı barədə daha çox məlumat əldə etmək üçün ondan müsahibə alıb.
- Xahiş edirəm özünüzü təqdim edin.
- Mən Sylvain Barou, musiqiçiyəm, fleyta və balaban ifaçısıyam. Fransanın Bretan bölgəsindənəm. 30 ildir musiqi ilə məşğul oluram, onun 20 ilini peşəkar səviyyədə. Balabanda yalnız 5-6 ildir ki, ifa edirəm. Azərbaycana balaban ifaçılığının texnikası və üslubları öyrənmək üçün səfər etmişəm. Bu mənim üçün önəmlidir.
- Daha əvvəl hansı musiqi layihələriniz olub? Gələcək üçün hansı planlarınız var?
- Mən peşəkar olaraq bu işə başlayanda, öz mədəniyyətimə - Kelt mədəniyyətinə aid musiqi ifa edirdim. Bretan Kelt bölgəsinin bir hissəsidir. Buna görə, Kelt musiqisi və İrlandiyaya aid irland musiqisi ifa etməyə başladım. Xarici ölkələrə səfərlərdən sonra başqa növ musiqilərlə daha çox maraqlandım. Xüsusilə də Türkiyə, İrana gedərkən bu ölkələrin musiqi üslublarını öyrəndim. Zamanla bu təsir altında öz üslubumu inkişaf etdirdim. Nəhayət, ifaçılıq bacarığımı inkişaf etdirmək, bu maraq məni müəyyən şeyləri öyrənmək və digər şeylər üçün Azərbaycana gətirib.
- Azərbaycan musiqisi haqqında nə düşünürsünüz?
- Mən bir çox səbəblərdən dolayı bu musiqini sevirəm. Əvəllər türk, iran və kürd musiqisini ifa etmişəm. Biz bu təsiri Azərbaycan musiqisində də tapa bilərik. Məncə, bu musiqi çox fərqlidir. Azərbaycan musiqisinin zənginliyi mənim üçün bənzərsizdir. Repertuar, bəstələr, alətlər, musiqinin dinamikası yalnız Azərbaycana aiddir. Bu çox gözəldir. Düşünürəm ki, bu musiqini dinləməyi məhz buna görə sevirəm.
- Balaban barədə necə öyrəndiniz?
- İlk növbədə, Alim Qasımovun Fransadakı konsertlərində olmaq şansım yarandı. Bu qrupda balaban ifaçısı var idi. Mən balabanı ilk dəfə Parisdə, Alim Qasımovun konsertində gördüm. Balabandan və şübhəsiz, alim Qasımovun ifasından çox təsirləndim. Fransada ermənilər balabanın bir versiyasını ifa edir və ona "duduk" deyirlər. Onların öz musiqisi və üslubları var. Mənim inkişaf etdirmək istədiyim musiqi balabana, Azərbaycan musiqisinə daha yaxındır. Buna görə bura gəlirəm. Bu mənim seçimdir.
- Çünki mənim fikrimcə, balabanın vətəni Azərbaycandır. Köhnə lent yazılarını dinlədiyimdə, bu alətin detallarını, onun yaranmasını hiss edirəm. Bu, həqiqətən, Azərbaycana, Qarabağa aiddir. Bunu öyrənmək üçün yeganə imkan Azərbaycan gəlməkdir.
Müsahibəni götürdü: İslam Məmmədov