Əslən azərbaycanlı olan Ülkü Taşlıova 1963-cü ildə Türkiyənin Qars şəhərində dünyaya gəlib. Ülkü Taşlıovanın söykökü Qazax şəhərinin Salahlı bölgəsinə gedib çıxır. Onun ata-babaları Qazax şəhərindən sonra Borçalıda, daha sonra isə Türkiyənin Qars şəhərində məskunlaşıblar.

Yazıçı, şairə Ülkü Taşlıova Beynəlxalq Avrasiya Mətbuat Fondunun qonağı olub və “Eurasia Diary”ə müsahibə verib.

- Ülkü xanım yazıçılığa nə zaman başladınız? Ədəbiyyata olan sevginiz hardan gəlir?

- Yazıçılıq həmişə həyatımın bir parçası olub. Ədəbiyyata olan sevgim ailəmdən gəlir. Atam Şərəf Taşlıova YUNESCO-nun "Canlı insan xəzinəsi" titulunu qazanmış bir aşıqdır. Qars şəhərinin İnönü Prospekti üzərindəki "Aşıklıq heykəlləri"ndə Şərəf Taşlıovanın heykəli ucaldılmışdır. Qarsdakı aşıqlar atamı “Aşık-ı Azam”, yəni ən böyük və ən ulu aşıq adlandırırlar. Fəxri doktor adına layiq görülən atam Şərəf Taşlıova, ədəbiyyat dünyasının ən sayılıb-seçilən nümayəndələrindən biridir.

Şərəf Taşlıova

Mənim qanımda ədəbiyyat sevgisi var. Bizim evimizdə ədəbiyyatdan danışılırdı. Evimizdə Səməd Vurğunun, Bəxtiyar Vahabzadənin və digər görkəmli ədəbiyyatçıların əsərləri oxunurdu. Yəni, mən ədəbiyyatla: hekayələrlə, şeirlərlə, aşıq əsərləri ilə böyüdüm.

- Bizə öz əsərlərinizdən, onları ərsəyə gətirməyinizdən danışa bilərsinizmi?

- “Anamı öldürdüm” çap olunmuş ilk kitabımın adıdır. Erməninin bir uşağı anasını öldürməyə məcbur etməsindən bəhs edən bu kitabda tarixi hadisələr öz əksini tapıb. Bu yaxınlarda yeni bir kitabım çap olunacaq. “Kümbet Dergisi”, “Edebice Dergisi”, “Kurgan Edebiyat Dergisi”, “Moral Dergisi”, “Kardeş Kalemler Dergisi” və s. jurnallarda və bir çox qəzetlərdə əsərlərim çap olunub. Bundan başqa, bir çox əsərləri tərcümə etmişəm.

- Ülkü xanım, Azərbaycan sizin üçün nə ifadə edir?

- Azərbaycan mənim dədəmdir, nənəmdir, itgin düşmüş soyumdur, ağlamış anamdır, əzab çəkmiş bacımdır! Nərgiz nənəmin “Orada qalan qohumlarıma hələ də zülm edirlərmi?” deyərək ağladığı gözyaşımdır Azərbaycan! Həsrətimdir Azərbaycan! Bu 150 illik bir həsrətdir. 150 illik bir itgim var, nənəmin ağlayaraq danışdırları var.

- Bugün Azərbaycanda olduğunuz üçün hansı hisləri keçirirsiniz?

- Eşq...

- Sizin daxilinizdə Azərbaycana çox böyük sevgi və həsrət var. Azərbaycan xalqına nə demək istəyirsiniz?

- İlk növbədə, azərbaycanlıları çox sevdiyimi demək istəyirəm. Azərbaycan xalqını sevmək: özümü sevməkdir; atamı, anamı, nənəmi, babamı, torpağımı sevməkdir. Mən azərbaycanlıyam, Azərbaycan türküyəm. Demək istəyirəm ki, necə dəyərli olduqlarını görsünlər. Azərbaycanlılar çox gözəl insanlardır. İnsanlığı, sənəti ilə türklüyə yaraşan dəyərlərin çoxu Azərbaycanda qorunub saxlanılır. Bu dəyərləri itirməyin, çünki bu dəyərlər itərsə insanlıq da itər. Azərbaycanlı olmaq, özəl olmaqdır. Bütün dünya azərbaycanlılardan insanlıq öyrənməlidir.

Təbriz ABBASOV