"Ermənistan Azərbaycanla sərhəddə hərbi təxribat törətməklə bütün dünyaya təcavüzkar və işğalçı kimi əsl simasını göstərdi".

Bunu Litvanın tanınmış hərbi jurnalisti, Xocalı soyqırımının şahidi, Beynəlxalq Avrasiya Mətbuat Fondunun Litvadakı nümayəndəsi Riçardas Lapaitis EDNews.net-ə müsahibəsində deyib.

O qeyd edib ki, İrəvanın Tovuz istiqamətində növbəti təxribatı hakimiyyətə küçədən gəlmiş şəxsin rəhbərlik etdiyi Ermənistandakı siyasi və iqtisadi böhranla əlaqədardır.

“Paşinyan Ermənistanı uçuruma aparıb və indi diqqəti ölkə daxilində yaranmış böyük problemlərdən yayındırmaq istəyir. Bütün bunlar ölkəni idarə edə bilməyən baş nazirə sərf edir, onun populyarlığı isə erməni ictimaiyyətinin və bütün dünyanın gözündə azalır. Ermənistanın hərbi təxribat üçün Qarabağa aid olmayan bu istiqaməti seçməsi səbəbsiz deyil. Birincisi, buradan Gürcüstana yol gedir və təcavüzkar məqsəd var. İkincisi, Ermənistan bunu etməklə hamının diqqətini çəkmək və Rusiya və Türkiyəni öz çirkli siyasi oyunlarına cəlb etmək istəyir. Ümid edirlər ki, Rusiya onları dəstəkləyəcək. Ancaq sual olunur, indi bu kimə lazımdır?".

R. Lapaitis əminliklə bildirib ki, Azərbaycanın işğal olunmuş ərazilərini azad etmək üçün hər cür şansı var.

“Düşünürəm ki, hazırkı vəziyyətdə Azərbaycan hər zamankindən daha güclüdür və bütün dünyaya başqa çıxış yolu olmadığını nümayiş etdirir - ölkə hərbi yolu seçməyə məcburdur. Azərbaycan Prezidenti dəfələrlə Azərbaycanın Ermənistan-Azərbaycan, Dağlıq Qarabağ münaqişəsinin sülh yolu ilə həllinin tərəfdarı olduğunu vurğulayıb. Bu təxribatla Ermənistan artıq təcavüzkarın kim olduğunu dünyaya göstərdi. Əvvəllər onlar Azərbaycanın Qarabağ xalqı ilə müharibə etdiyi təsəvvürünü yaratmağa çalışırdılarsa, indi həqiqi təcavüzkarın kimliyi hər kəsə aydın oldu".

Litvalı hərbi jurnalist, həmçinin bir neçə il əvvəl Tovuzun Ağdam kəndinə və digər yaşayış məntəqələrinə səfərini xatırladıb.

“Mən hələ o vaxt dəhşətli hadisələrin şahidi olmuşdum. Gecə atışmalarını, güllələnmiş divarları, şüşələri, evlərin damlarını, yaralıları lentə almışdım. Məktəb direktoru ilə görüşdə o mənə uşaqların atəş səsləri altında təhsil almağa vərdiş etməsi və atışma başlayanda uşaqların məktəbin digər tərəfinə keçdiklərini və sonra geri qayıtdıqlarını demişdi. Bir milyona yaxın məcburi köçkün doğma yurdlarını, müqəddəs yerləri ziyarət edə bilmir. Dağlıq Qarabağ və ətraf yeddi rayonda nə qədər məscid və muzey dağıdılıb. Mən öldürülən insanları, yandırılan əkin sahələrini gördüm. Bu barbarlıqdır. Ermənistan siyasəti dünya birliyinin, bir çox nüfuzlu təşkilatın gözləri qarşısında həyata keçirilən günümüzdəki faşizmdir. Bütün bunlara son qoyulmalıdır. Ermənistanın öz hərəkətlərinə görə cavab verməli olduğu vaxt çatıb.

Həmsöhbətimiz, həmçinin bir çox xarici hərbi jurnalistin Ermənistanın azğın hərəkətlərindən dəhşətə gəldiklərini söyləyib.

Riçardas Lapaitis Azərbaycan ədalətli yolda olduğunu və ermənilərin artıq vaxtı uzada bilməyəcəyini vurğulayaraq bildirib.

“İndi, Azərbaycan xalqı hər zamankından daha həmrəydir. Minlərlə azərbaycanlı Azərbaycan ordusuna, əsgər və zabitlərə dəstək üçün nümayiş keçirdi. Problemi həll etməyin vaxtı çatıb, əks halda, Cənubi Qafqazda çox sayda insan ölümü ilə nəticələnən geniş miqyaslı müharibə olacaq. Bunun qarşısını almaq üçün beynəlxalq təşkilatlar nəhayət lazımi tədbirlər görməli və işğalçı və təcavüzkar ölkəyə təsir etməlidirlər".

Riçardas Lapaitis şəhid əsgərlərin və mülki şəxslərin ailələrinə başsağlığı verib.

“Mən səmimi qəlbdən Azərbaycanın öz torpaqlarının hər santimetrini müdafiə etməsini arzulayıram, onun buna tam haqqı var və nəhayət beynəlxalq təşkilatları bunun belə davam edə bilməyəcəyinə inandırmağı arzu edirəm. Azərbaycanın Dağlıq Qarabağ və ətraf 7 rayonu erməni işğalından azad olunmalıdır”, deyə o sonda bildirib.