Eurasia Diary Argentinanın Azərbaycandakı səfiri Sergio Perez Gunella ilə eksklüziv video reportajı təqdim edir.
"Argentina ağlayır. Onunla birgə bütün futbol dünyası kədər içindədir. Futbol əfsanəsinin cəmi 60 yaşı vardı” – media bu cür başlıqlarla yayımlanan məqalələrlə doludur.
“Dieqo ailəmizin bir üzvü idi. O yalnız argentinalı deyil, həm də dahi şəxsiyyət idi. Biz eyni nəslin, eyni dövrün yetirməsiyik. Biz onu hər zaman izləyirdik və yerli komandalarda çıxış etməyə başlayaraq gözümüzün önündə dünya futbolunun əfsanəsinə çevrildi. Onun dünya çempionatında Argentina millisində çıxışını xatırlayıram. O həqiqətən bir əfsanə idi. Biz, futbol fanatları onun oyunundan həzz alırdıq. Əslində o kasıb və sadə bir ailədən çıxmışdı. İstedad, zəhmətsevərliyi və təhsili ilə futbol aləminin sonuncu əfsanələrindəndir.
1986-cı ildəki ən son Dünya kubokuna görə argentinalılar ona minnətdardır. İngiltərə millisi ilə oyunda ətrafında 6 ingilis futbolçusunun olmasına baxmayaraq meydanın mərkəzindən qol vura bilmişdi. Ən yaxşı futbolçu adına layiq görülmüşdü. Bu böyük nəaliyyət idi. O bizi arzumuza çatdırdı. O sıradan biri idi, amma hamımızın, xüsusən də bütün futbol azarkeşlərinin hər şeyinə çevrildi. Sıfırdan başladı və qəhrəmana (From zero to Hero) çevrildi”, deyə cənab səfir bildirdi.
Qeyd:
Maradona futbolçu karyerası ərzində əsasən “Barselona” (1982-84) və “Napoli”də (1984-91) oynaması ilə tanınıb. Argentina millisinin kapitanı olan əfsanə 1986-cı dünya çempionu, 4 il sonra vitse-çempionu adına yiyələnib. Neapol klubu ilə iki dəfə İtaliya çempionu adını qazanan Maradona narkotiklə bağlı qalmaqallar, həmçinin DÇ-1986-nın 1/4 finalında İngiltərəyə əllə vurduğu qolla da diqqət mərkəzində olub. Karyerasını 1997-ci ildə “Boka Xuniors”da başa vuran Maradona “Tekstil Mandiyu”, “Rasinq”, Argentina millisi, “Əl-Vəsl”, “Əl-Fuceyra”, “Dorados” və “Ximnasiya və Esqrima” klublarını çalışdırıb.