Eurasia Diary Rusiya Yazıçılar İttifaqının Volqoqrad şöbəsinin rəhbəri Aleksandr Çukanovla müsahibəni təqdim edir.

A.Çukanov müsahibəsində bildirib ki, bir yazıçı üçün səyahət etmək və insanlarla ünsiyyət qurmaq çox vacibdir.

“90-cı illərin sonu və 2000-ci illərin əvvəllərində Vladivostokdan Volqoqrada gedərkən maşınımda əyalət adamlarını da aparırdım. Bu sadə insanların mənə danışdıqları sonradan hansısa oçerkə çevrilirdi. Səmimi söhbətlər həm də düşüncələrimin formalaşmasına kömək edirdi”, o deyir.

Volqoqradda ədəbiyyat üzrə müsabiqə və seminarlar keçirdiyini deyən yazıçı, həmin seminarlarda mətnlərin səviyyəsinin aşağı olmasından gileylənib.

“İndiki gənclərin yazdıqları mətnlər daha çox təsvir xarakterlidir. Lakin yazıçı əlinə qələm götürəndə hisslərini ürəyindən keçirməli və əsər yarandığını dərk etməlidir”, o qeyd etdi.  

A.Çukanov fəaliyyətinin ilk dövründə qarşılaşdığı çətinliklərə də toxunub. O, 90-cı illərdə ədəbiyyatın siyasiləşdirildiyini və yazıçılar üçün çox çətin bir dövr olduğunu deyir.

“Həmin dövrdə ailəmi necə dolandıracağımı düşünürdüm, yaradıcılıq onuncu yerdə dururdu. Şəhər mərkəzində yerləşən binamızı əlimizdən almaq istəyirdilər və arbitraj məhkəməsindən başladı hər şey. Bu bir növ yaşamaq uğrunda mübarizə idi”, Çukanov söylədi.  

Son illərdə senzura ilə qarşılaşmadığını deyən yazıçı, əxlaqi mövzularda senzuranın vacib olduğunu da qeyd edib. O, siyasətə qoşulmağa cəhd edən yazıçılar barədə fikir bildirərkən yazıçının müstəqil olması gərəkdiyini və bu ikilidən yalnız birini seçməli olduğunu dedi.

“Siyasətçilər insanların vətənpərvərlik hisslərinin tərbiyə edilməsinə və bundan faydalanmağa çalışırlar, ancaq bunun əksi baş verir. Vətən sevgisi anaya olan sevgidir, vətəni zorla sevmək olmaz".

Onun sözlərinə görə, kitaba da sevgi zorla olmamalıdır. Bunun üçün həvəs olmalı və təhsilindən asılı olmayaraq hər kəs öz sahəsinə aid kitablardan yararlana bilər.  

Yazıçı, Sibir və uzaq Şərq mövzusunda qələmə aldığı “Qızıl axtaran” adlı romanından bəhs edib. O roman əsasında ssenari yazdığını, lakin pandemiya səbəbindən filmin yubandığını dedi. Müəllifin sözlərinə görə, əsərdə qızılın axtarılması, bunun həyat tərzinə çevrilməsindən, qızılın zənginliklə yanaşı şərin simvolu olmasından danışılır.

Çukanov, dostluq münasibətlərində milliyət faktorunun onunçün vacib olmadığını, çətin də olsa hər zaman uzaqda yaşayan dostlarına baş çəkməyə çalışdığını dedi. O, Azərbaycana səfərindən söz açarkən buradakı rus məktəblərinin, Lermontov küçəsinin, Puşkin və Yeseninə qoyulan abidələrin diqqət çəkdiyini vurğulayaraq, Bakıda köhnə və müasir memarlıq nümunələrinin bir-birini əvəz etdiyini qeyd etdi. Həmçinin Şamaxıya səfərinin ona Puşkinin “Şamaxı çariçası” əsərini xatırlatdığını dedi. Sonda o, Azərbaycana səfər edərək müharibə nəticəsində əldə edilən nəaliyyətləri görmək istədiyini bildirdi.  

Daha ətraflı videoda:

Müsahibəni aldı: Cəmilə Çebotareva

Tərcümə: Gülnar Səlimova