Türkiyə Cümhuriyyətinin Mədəniyyət və Turizm Nazirliyinin dəvəti və onun nəzdində fəaliyyət göstərən Türkiyə Turizm Tanıtım və İnkişaf Agentliyinin təşkilatçılığı ilə baş tutan səfəri zamanı jurnalistlər “Kolin” şirkətlər qrupunun baş direktoru, Türkiyə hotel mütəxəssisləri birliyinin baş təmsilçisi Mehmet Satarla görüşüblər. Hotelin foyesində Azərbaycanlı media nümayəndəni salamlayan M.Satar növbəti gəzinti zamanı jurnalistlərin yol yoldaşı olub.
Bir müddət Azərbaycanda yaşayıb fəaliyyət göstərən Türkiyəli iş adamı Mehmet Satar Eurasia Diary-yə müsahibə verib.
Mehmet Satar ilk öncə Azərbaycanın Qarabağdakı şanlı zəfərindən qürur hissi ilə söz açıb.
“2012-ci ildən 2015-ci ilədək qardaş Azərbaycanın Naftalan rayonunda hotel və turizm sahəsində çalışdım. Qaldığımız yer cəbhə bölgəsinə çox yaxın idi və bu mənə Qarabağla bağlı bir çox təəssüratlar bəxş etdi,” - deyə Mehmet bəy bildirib.
“Bunu səmimi qəlbdən demək istərdim ki, mən karyeramın ən gözəl anlarını ikinci vətənim olan Azərbaycanda keçirdim. Orada olduğum müddətdə özəlliklə hörmətli Prezident İlham Əliyev və birinci xanım Mehriban Əliyevanın bizə olan xüsusi qayğı və diqqətini gördüm. Hal hazırda otağımda da prezident İlham Əliyev və Mehriban xanımla birgə çəkdirdiyimiz xatirə şəkillərimiz ən yuxarı başda yer alır" – deyə, iş adamı əlavə edib.
Mehmet Satar burada yaşadığı 3 il müddətində çox şeylər gördüyünü deyib: "Naftalanda “Qarabağ” sanatoriyasının tikilişindən istismara verildiyi ana qədər orada olduğum müddətdə çoxlu sayda səmimi dostlar qazandım. Döyüş bölgəsinə yaxın bir ərazidə olduğum üçün orada yaşayan insanlarla daha yaxın münasibətdə ola bildim. Əlimdəki imkanlardan istifadə edərək oradakı insanların əhvalı ilə yaxından maraqlanmağa çalışdım, hər zaman dərdlərini bölüşmək üçün onların aralarına qatıldım. Mən türkiyəli qardaşınız kimi ermənilərin təcavüzkar siyasətinə bilavasitə şahid olan biriyəm. Şanlı qələbəni eşidərkən özümü saxlaya bilmədim, gözlərim yaşla doldu”.
- Qarabağ zəfərindən sonra, işğaldan azad edilən əraziləri dirçəltmək üçün ilk olaraq türkiyəli iş adamları həmin yerlərə yatırım qoymağa təşəbbüs göstərdi. Şəxsən Azərbaycanda iş təcrübəsi olan bir holding rəhbəri kimi sizin də bu kimi layihələrdə iştirak etmək planınız varmı?
- Qeyd edim ki, “Kolin” şirkətlər qrupu olaraq Qarabağdakı bütün yol inşaat işlərində iştirak etməkdəyik. Məqsədimiz ilk öncə Qarabağa qayıtmaq istəyən azərbaycanlı qardaşlarımız üçün dağılan yolları bərpa etmək və yeni yol inşaatlarını həyata keçirməkdir.
- Bildiyimiz qədər Şuşaya gedən yolun bərpası da hazırda sizin holdinq tərəfindən həyata keçirilir. Bu yaxında hörmətli Dövlət Bahçeli də Şuşada inşa ediləcək məktəbin birgə layihəsini təqdim etmişdi və yaxında hər iki dövlət başçılarının iştirakı ilə həmin məktəbin təməlləri atılacaq. “Kolin” şirkətlər qrupunun bu layihədə bir qatqısı olacaqmı?
- Bu barədə hələlik dəqiq bir şey deyə bilmirəm. Lakin böyük bir ehtimalla deyə bilərəm ki, holdinqimiz yol layihələrini uğurla başa vurduqdan sonra, orada yadda qalan bir quruculuq işlərində yaxından iştirak etməyi planlaşdırır.
- Məlumdur ki, pandemiya dünyanın hər yerində hər bir sahəyə öz təsirini göstərib. Bəs pandemiya Türkiyədə hotel sahəsinə necə təsir göstərib?
- Əlbəttə pandemiyanın təsiri bizdən də yan keçmədi. Lakin bir çox xüsusi tədbirlər sayəsində biz bunun öhdəsindən uğurla gələ bilirik. Hazırda ən böyük hədəfimiz Çanaqqalada Avropa ilə kiçik Asiyanı birləşdirəcək körpü layihəsinin başa çatdırılmasıdır. Əgər körpünü inşasının başa çatması pandemiyanın bitməsi ilə üst-üstə düşərsə, ümid edirəm bu Türkiyə turizminin daha da çiçəklənməsinə təkan verəcək. Bildiyiniz kimi, Çanaqqala pandemiyaya qədər turizm sahəsində parlayan bir ulduz məkanlardan idi. Vaxtilə bura minlərlə turistlər Troya tarixi abidələri və oksigenlə zəngin olan Qaz dağlarının gözəlliklərindən zövq almaq üçün gəlirdilər. Ümid edirəm bu inkişaf yaxın gələcəkdə daha da sürətlənəcək. Eyni zamanda burada biz Azərbaycanlı qardaşlarımızı da səbrsizliklə gözləyirik və gözümüz üstündə yeriniz var deyirik.
Elnur Ənvəroğlu
Çanaqqala, Türkiyə