“Türkiyə Azərbaycana qardaş ölkədir və İsrail bizim strateji tərəfdaşımızdır. Dostlarımızın bir-biri ilə dost olmasını istəyirik” Hikmət Hacıyev deyib.
Azərtac xəbər verir ki, bu barədə Şmuel Din Elmas ötən gün İsrailin nüfuzlu İsrail HaYom qəzetində yazıb.
Müəllif İsrail ilə Azərbaycan arasında ikitərəfli münasibətlərin son bir ildə xeyli yaxşılaşdığını qeyd edir. "Azərbaycan 1991-ci ildə müstəqilliyini elan etdikdən sonra və 2020-ci ildə Dağlıq Qarabağda inandırıcı və parlaq qələbə qazandığı müharibə dövründə iki ölkə arasındakı təhlükəsizlik, iqtisadi və humanitar əlaqələr ən yüksək səviyyəyə çatdı", məqalənin müəllifi vurğulayır.
“Hikmət Hacıyev Azərbaycan Prezidentinin köməkçisi, Prezident Administrasiyasının xarici siyasət şöbəsinin müdiridir və bu vəzifə İsraildəki “məsləhətçi” tərifinə uyğun gəlmir. Hikmət Hacıyev ölkənin ikinci böyük şəhəri olan Gəncə şəhərində anadan olub. Bu şəhər müharibə zamanı düşmən tərəfindən atəşə məruz qalmışdı. O, müharibə başladığı zaman Prezident Administrasiyasındakı təhlükəsiz ofisini tərk edərək Ermənistanın bombardmanından zərər çəkmiş mülki insanlarda ruh yüksəkliyi yaratmaq üçün onları ziyarət etdi”, məqalənin müəllifi qeyd edir.
İsrail Hayom-a eksklüziv müsahibəsində Hikmət Hacıyev İsrailə, onun qazandığı uğurlara və vətəndaşlarına qarşı böyük hörmət hissi bəsləməsindən bəhs edir, Bakının İsrail-Türkiyə yaxınlaşmasını çox vacib hesab etdiyini söyləyir, Vaşinqtonu tənqid etdiyini, qonşu İranla nüvə anlaşması ilə bağlı Azərbaycanın mövqeyini qeyd edir və niyə Azərbaycanın Tel-Əvivdə səfirliyinin olmadığını izah edir.
Hikmət bəy, Prezident Əliyev iki ölkə arasındakı fikir ayrılıqlarını aradan qaldırmaq üçün Baş nazir Binyamin Netanyahu və Türkiyə Prezidenti Rəcəb Tayyib Ərdoğanla üçtərəfli zirvə görüşü keçirməkdə maraqlıdırmı?
“Türkiyə Azərbaycana qardaş ölkədir və İsrail bizim strateji tərəfdaşımızdır. Dostlarımızın bir-biri ilə həqiqətən dost olmasını istəyirik. Tərəflər bu təşəbbüslə razılaşsalar, Azərbaycan bunu daim dəstəkləyəcək".
İsrail ilə Türkiyə arasındakı münasibətlərin son dövrdə inkişafı Prezident Əliyevin vasitəçilik səyləri ilə əlaqədardır?
“Hesab edirik ki, İsrail və Türkiyənin oxşar maraqları var. Hesab edirik ki, aralarındakı əməkdaşlıq da bu maraqlara xidmət edir. Azərbaycan bu münasibətləri yaxşılaşdırmaq üçün əlindən gələni edir”.
İsrail ilə Azərbaycan arasındakı münasibətləri unikal edən nədir?
“Münasibətimiz sözlərə əsaslanmır. Və strateji xarakter daşıyır. Biz bir-birimizi başa düşürük. Düşünürəm ki, bu münasibətlər əslində xalqlarımız arasındakı əlaqəyə əsaslanır. İsrail-Azərbaycan münasibətləri dürüst tarixi anlaşma üzərində qurulub. Tərəfdaşlığımıza və əməkdaşlığımıza xələl gətirməyə çalışan ölkələr var, baxmayaraq ki, Azərbaycanla yaxşı və stabil münasibətlər bütün dünyada yəhudi xalqının marağındadır”, Hikmət Hacıyev bildirib.
Bununla yanaşı, İsrail məsələsində olduğu kimi, Azərbaycan həqiqətən də Bayden rəhbərliyinin İranla bağlı qırmızı xəttinin haradan keçdiyini bilmir. ABŞ rəhbərliyindən “mesajlar gözləyirik” deyən Hacıyev “son iki ABŞ administrasiyası Cənubi Qafqazda tam olaraq fəaliyyət göstərməyiblər. Əksinə, Obama administrasiyası İsrail də daxil olmaqla dostları ilə davranışlarında səhvlərə yol verib. Eyni sözləri Azərbaycan haqqında da söyləmək olar”, o deyib.
Azərbaycanlılar üçün əsas məsələ Bayden rəhbərliyinin erməni soyqırımını tanıma qərarıdır. Bu baxımdan Hikmət Hacıyevin mövqeyi birmənalıdır. "Bu tarixi səhvdir", o deyir. "Heç bir şey Holokostla müqayisə oluna bilməz".
Vaşinqtondakı Yəhudi lobbisi ilə əlaqə saxlayırsınız?
“İsrail ilə münasibətlərimiz hər sahədə əladır. Eyni zamanda İsrail-Azərbaycan münasibətləri də Yəhudi və Azərbaycan xalqları arasındakı dostluq və mükəmməl münasibətlərin harmoniyasına əsaslanır. Bizim üçün lobbi adlı termin yoxdur; ABŞ-da yaşayan yəhudilər Azərbaycanın dostudur və dostluğumuz dünyanın hər yerindəki kimi yəhudilərlə olan eyni dostluğa əsaslanır.
“ABŞ-dakı yəhudi təşkilatları Azərbaycan həqiqətini çatdırmaqda bizə çox kömək edir, yəni bölgədə yeni əməkdaşlıq parametrləri, Cənubi Qafqazda sülh və sabitlik yaratmağa çalışırıq.
Müxtəlif mədəniyyətlərin və dinlərin nümayəndələri Azərbaycanda əsrlər boyu yaşayıblar. Qürur duyuruq ki, Azərbaycanda yaşayan yəhudilər və dünyanın hər yerindən gələn yəhudilər bizə həqiqətən də kömək edirlər".
İranla nüvə anlaşması ilə bağlı ölkənizin mövqeyi necədir?
“Biz hər zaman danışıqları dəstəkləyirik. Bu danışıqlar faydalı ola bilər və xalqlar arasında qarşılıqlı anlaşmaya kömək edir".
Niyə Azərbaycanın İsraildə səfirliyi yoxdur?
“İsraillilər Azərbaycana gələndə İsrailə olan münasibətimizi görür və ölkənin hər yerində İsrail bayraqlarının asıldığını görə bilərsiniz. Bu, Azərbaycan xalqının ürəyindən və istəyindən irəli gəlir və ölkələr və xalqlar arasındakı münasibətlərə görə minnətdarlığını ifadə edir. Mükəmməl qarşılıqlı anlaşma və əla diplomatik dövlətlərarası əlaqələrimiz var. Müstəqilliyimizi elan edəndə İsrail Azərbaycanı tanıyan ilk ölkələrdən biri idi. Bəzən bir ölkədə diplomatik nümayəndəlik mövcud ola bilər, ancaq münasibətlər [İsrail və Azərbaycan] qədər yaxşı deyil".
Bakıdakı hökumətdən əlavə, Azərbaycan xalqına da dərindən təsir edən hadisələrdən biri də Vətən müharibəsi qurbanlarını - azərbaycanlı əsgər və zabitləri müalicə etmək üçün Azərbaycana gedən İsrail oftalmoloqlarının nümayəndə heyəti idi. “Öz ölkələrində işlərinin çox olmasına baxmayaraq, onlar Azərbaycana gəldilər və gündə 10-15 əməliyyat apardılar. Bu, həmişəlik yəhudi xalqının hörmət və ehtiram əlaməti olaraq qalacaq və başqası üçün narahatlıq hissi keçirmək yəhudi xalqının DNT-nin bir hissəsidir. Bu, israillilərin bizə kömək etmək istəyi ilə əlaqədardır. Digər oxşar təşəbbüsləri həyata keçirmək və İsrailin təcrübəsindən yaralı uşaqlarımıza kömək etmək üçün istifadə etmək niyyətindəyik".
İsrail şirkətlərini Qarabağdakı bərpa prosesinə cəlb etmək fikriniz varmı?
“İsrail şirkətləri ilə əlaqə qururuq və hökumətlərarası əlaqələrdən istifadə edirik. İsrail şirkətlərinin bizə kömək etmək üçün böyük texnoloji potensialı var. İsrail şirkətlərinin ağıllı şəhərlər və su ehtiyatları idarəçiliyi quruculuğunda kömək etməsində maraqlıyıq".
Yekunda İsrailə hansı mesaj göndərmək istəyirsiniz?
“İsrailə sülh arzulayıram və Azərbaycan və İsrail xalqlarının əsl tarixi dostluğuna inandığımı bildirmək istəyirəm. İsrail xalqı həmişə sülhün olmamasından əziyyət çəkib. İsrail xalqına sülh və İsrail dövlətinə davamlı uğurlar diləyirik. Start up nation- bizim dostumuzdur və bu ölkəyə böyük uğurlar diləyirəm".